Pele an zai

Brazil legend Pele chu a rila bawk awm vangin an zai. Kum 80 mi Pele hi damdawi inah kar khat an awm tawh a, kar liam ta Inrinni khan zai a ni.

Pele chuan, "Min duhsakna thu ṭhahnem tak ka dawn avangin ka lawm hle. Pathian min kaihruainaah ka lawm a, min enkawl tura Dr Fabio leh Dr Miguel min pe hi ka tan vanneihna a ni.

"Nangni nen hian vawi tam tak hlawhtlinna ka lo chang tawh ṭhin a, tun ṭuma kan inkhelhnaah pawh hian hnehna ka chan ngei ka beisei. Min hmangaihtu ṭhiante leh chhungten min hual a, a êng zawngin ka hmalam hun hi ka thlir," tiin instagram-ah a ziak.

February 2020 khan Pele fapa Santos goalkeeper hlui Edinho chuan a pa chu puitu tel loa a kal theih loh avangin an chenna in chhuahsan hrehawm a tih thu a sawi tawh.

Tun hnaiah Pele hriselna hi a pan ve hle. Kum 2015 thla ruk chhunga damdawi inah ṭum hnih a luh avangin a kap bawr zai a ni a, kum 2019 khan zun kawngah harsatnaa neih avangin zai a ni leh bawk.

Guinness Book of World Records-a tarlan danin Pele hian match 1,363-ah goal 1,279 a khung a, chung zingah chuan ram tana match 91-a goal 77 a khung pawh a tel a ni.