India an chak, 2-1 in hma an hruai
India-in Thawhṭanni khan Oval-ah mualneitu England chu 157 runs-in fourth Test-ah an hneh a, fifth Test khelh hmabak la awmah an tlawm lo a nih chuan series an la dawn. September 10-14 chhung hian Old Trafford-ah fifth Test hi khelh a ni ang.
Kum 1971 daih tawh khan India-in Oval-ah hnehna an chang a, a vawi khat nan England chu an mualah hnehin Test series an la. Kumin hi kum 50-na a ni a, Men in Blue hian England-ah ngei series la leh thei dinhmunah an ding.
India hian England-ah hian Test series vawi 18 an khel tawh a, vawi thum chiah hnehna an la chang. Kum 1971-a hnehna an chan bakah hian kum 1986 leh 2007 khan an chak leh tawh. Team pahnih hi ṭum khat inhnehtawk a, a bakah zawng chuan England-in hnehna an chang a ni.
Rinkai Three Lions
Third Test-ah India an mualpho a, fourth Test-ah England chak tura rinkai an ni. Ṭhumvawrah Three Lions an chak a, captain Joe Root-a'n vawm hmasak a thlang. First innings-ah India an che ṭha tawk lo a, captain Virat Kohli (50) leh Shardul Thakur (57) ten half century an siam zarah 191 runs an siam hram.
English bowler Chris Woakes-a'n wicket li a la a, Ollie Robinson-a'n wicket thum la ve bawkin England chu dinhmun ṭhaah an dah. England bat hun a thleng a, Indian bowler Umesh Yadav leh Jasprit Bumrah te an langsar ve thung. Over 24.3-ah wicket nga an chan tawh a, 62 runs chauh an la siam.
Test match hmasa pathuma che ṭha Root-a'n 21 runs chauh a siam a, India-in beiseina nei sang viau mah se Ollie Pope (81), Woakes (50), Jonny Bairstow (37) leh Moeen Ali (35) te zarah England-in 290 runs an siam.
India chhantu Rohit
First innings an khel zo a, England 99 runs-in hma an hruai. India-in chhantu a mamawh a, opener Rohit Sharma a rawn pen chhuak.
Kum 34 mi Rohit hian 127 runs a rawn siam a, India dinhmun an ti ṭha hle. Indian batsman-te an che ṭha rual a, Cheteshwar Pujara (61), Rishabh Pant (50) leh Shardul Thakur (60) ten half century siam leh bawkin second innings-ah 466 runs an siam.
India-in mualneitu tan target 368 runs an siam avangin an dinhmun a ṭha leh ta zawk a, Rohit Sharma century zarah chak thei dinhmunah an ding.
Ennawm hmuhnawm
Ni linaah England-in an bat hman a, thi loin 77/0 runs an siam. Ni ngana a hmuhnawm dawn tih chu cricket ngaina chin chuan an hria.
Chutihrualin batsman-te chet ṭhatna ṭhin Oval pitch-ah meuh pawh England tan chak a harsa dawn a, draw erawh result ṭha tak a la ni tho.
India bowler Thakur chuan opener Rory Burns chu 50 runs a siam tihin over 40.4-naah a vawm hlum a, England hian 100 runs an siam hman.
English batsman Dawid Malan-a'n thutlukna siam sualin ṭul lo takin a run out a, India dinhmun a tih ṭhat phah. Ravindra Jadeja-a'n opener Haseeb Hameed a vawm hlum ve leh a, dinhmun ṭhaa India dah turin bowler ṭha mi Jasprit Bumrah a rawn inlar zui.
Bumrah-a'n Ollie Pope (2) leh Jonny Bairstow (0) te pavillion lamah a thawn let leh vat a, Shardul Thakur-a'n England captain Joe Root a vawm hlum leh hnu phei chuan India an chak ngei dawnah a ngaih theih tawh.
England hian second innings-ah 210/10 runs chauh an siam a, India target chhawpsak zat 368 runs chu 157 runs-in an pha ta lo.
Lord's-a hnehna kan chan ang thoa a hlut loh pawhin a aiin a nasa ang. Kan inlungrual a, chak duhna thinlung kan pu a, chak dan hram kan zawng ṭhin. Mimal hamṭhatna ringawt ngaihtuah chuan tun ang record hi a neih theih loh. Team angin hmachhawp kan nei a, chak tumin inlungrual takin kan bei ṭhin. Chuvangin hnehna kan chan pawh hi a hlu em em a ni. - Virat Kohli, India captain
A pawi kan ti takzet. Zing kan tho a, chak thei dinhmunah kan ding tih kan hria. Inkhel pumpui kan thlirlet chuan ball man kawngah kan insiamṭhat a ṭul (England hian vawi ruk ngawt ball an thlauh). Test match tawp berah thawhchhuah ngei kan tum ang. - Joe Root, England captain