Guinea buaina karah Naby Keita a him
Liverpool chuan an midfielder Naby Keita chu Guinea ram buainaah awm mah se a dinhmun a ṭhat thu an sawi a, an player hi hruai kir dan tur an ngaihtuah mek.
Guinea chu Thawhṭanni khan Morocco nen World Cup qualifier-a intawng tur an ni a, mahse, Guinea-ah sipai chakna hmanga sorkar paihthlak tumna a awm avangin buaina a chhuak nasa hle.
Presidential Palace-ah Thawhṭanni khan silaia inkahna nasa takin a thleng nia sawi a ni a, hetiang a nih avang hian inkhelh hun tur pawh sawn a ni.
Football club-ten an player-te chanchin an ngaihven nghal vat a, heng zingah hian player langsar Keita chanchinin ngaihven a hlawh lehzual - Liverpool chuan an player hi a him thu an sawi.
A him e
Col. Mamady Doumbouya-a kaihhruai sipaite chuan Guinea hi an la fel tawh nia sawi a ni a, President Alpha Condé kaihhruai Guinea sorkar chu an paihthla fel tawh - Conde chunga an hmalak zel dan tur a la hriat loh.
UN leh African Union ten Doumbouya kaihhruai sipai pawl chet dan dem mah se mipui lamin an thlawp a, Doumbouya chuan eirukna leh mipui chunga hleilenna do avanga sorkar thar siam tum an nih thu an sawi.
Hetianga Guinea buaina karah hian Liverpool chuan Keita dinhmun a him thu an sawi,. Merseyside club thupuangtu chuan Keita chanchin ngaichanga an inbiak reng thu a sawi a, "An national team management kaltlangin inbiakna kan nei reng.
"Keita a him a, duat taka enkawl mek a ni. Chutihrual chuan engtiklai pawhin thil a inthlak thei reng tih kan hria a, Naby hi him leh dam taka Liverpool-a hruai kir a nih theih dan tur kan ngaihtuah reng a ni," a ti.
Morocco lam
Guinea nena inkhel tura thlawk lut Morocco squad pumpui chu an ram lamah hruai kir an ni tawh a, coach Vahid Halilhodzic chuan an thlenna Conakry hotel-a an awm laiin ni leng deuhthawa silai inkap ri an hriat thu a sawi!
Mahse, ram pahnih hotute an inbiak hnuah Morocco squad hi an chhuah phalsak an ni a, tunah chuan him takin an awm tawh. Journalist Cellou Diallo chuan, "Guinea ramrite chu khar vek a ni rih a, mahse, Morocco squad leh match official te chu Guinea an chhuahsan phalsak an ni," an ti.
Morocco leh Paris St-Germain fullback Achraf Hakimi chuan, "Message leh inthlawpna zawng zawng avangin lawmthu ka sawi e. Ni hrehawm tak a ni a, mahse, tunah chuan him leh dam takin Morocco-ah kan awm tawh a ni," tiin twitter-ah a ziak.
Wolverhampton Wanderers defender Roman Saiss chu Morocco captain a ni a, English football-a inkhel zingah Queen Park Rangers striker Ilias Chair leh Watford player pahnih Adam Masina leh Imran Louza te pawh squad-ah hian an awm a ni.