Southgate-a'n ngaihdan zau tak a nei

England manager Gareth Southgate chuan FIFA-in kum hnih dana World Cup neih a rawtna chu a hriatthiam thu a sawi a, chutihrual chuan football-a inhnamhnawih zawng zawngte rawn a pawimawh thu a sawi.

Southgate hian Arsenal manager hlui, tuna FIFA global development hotu ni ta Arsene Wenger pawh a titi pui tawh. English coach chuan, "Khelh khat a nihna hian World Cup a tihlu a, chutiang ngaihlu tan chuan a uiawm khawp ang.

"Chutihrual chuan World Cup khelh dawna inhliam player dinhmun ka hriatthiampui tel a, kum riata vawi khat vel chiah chance neih chu a uiawm em em dawn a ni," a ti.

England hian zanin dar 12:15-ah World Cup qualifier khel turin Poland an lenchilh dawn a, match nga an khelh tawhah an la tlawm loh avangin point thum hlawhchhuah an beisei ang.

Team pahnih hi khelh zat inangah point ngain an inthlau mek a, World Cup 2022 khel turin group tina pakhatna chauh chu automatic-a tling tur an nih avangin boruak a san loh ring suh.

Poland-in tlarhmaah Robert Lewandowski an neih avangin goal nawr kawngah kher chuan an ngaihtuahawm ngai lo - Bayern Munich tan tun season-ah match li khelin goal sarih a khung leh der tawh!

Tun international break-a match hnih an khelhah pawh Lewy hian goal thum a khung tling leh der tawh a, goal khung a ṭhulh san thei lo - England tlarhnung tan ven bik a ṭul ang.

Chutihrual chuan hmel thar Adam Buksa hi England tan ngaihthah palh a hlauhawm - kum 25 mi striker hi ram tana a match hmasa pahnih khel zo hlim a ni a, goal li a khung der tawh.

Hriat tel tur erawh Poland tlarhnung hi San Marino laka goal chhuahtu an ni a; Harry Kane, Raheem Sterling leh Mason Mount te hoin an nawr dawn avangin inven uluk a ṭul khawp ang.

England hian tun international break-ah match hnih khel tawhin goal riat an khung a, an lamah a lut lo - Poland-in match hnihah vek goal 11 khungin an lamah goal hnih a lut a, team pahnihin goal khung an tum dawn.