Iceland hmaah Germany fiahna

Germany-in coach thar Hansi Flick hnuaiah Liechtenstein (2-0) leh Armenia (6-0) te an hneh a, ram pahnih hi fiahna a la tling lo a nih chuan zanina Iceland an hmachhawn tur erawh fiahna a ni thei tawh ang.

Zanin dar 12:15 hian Reykjavík-ah Iceland-in Germany hi an mikhual dawn a, table-a an dinhmun thlir erawh chuan an inkarah hian point riat zet a awm.

Iceland hian Euro 2016 quarterfinal an luh hnuah World Cup 2018 khel turin inpettling mah se Euro 2020-ah an tel pha lo. World Cup 2022 khel tur zawnnaah pawh hian Iceland hian point li chauh an la hmu.

Hetihlai hian Germany erawh Flick-a hnuaiah an intuai thar mek. Bayern Munich manager hlui Flick-a'n football hmuhnawm a khelhtir leh avangin ngaihven pawh an hlawh phah hle.

Kum 56 mi Flick hian player a siksawi vak a rinawm lo a, Hoffenheim defender David Raum erawh mual sirah bul a ṭan a rinawm. Tlarhma lamah Kai Havertz chu damlohna avangin bul a ṭan theih a rinawm lo a, chutihrualin match hniha goal khung ve ve Timo Werner erawhin hmun pawimawh a chan chhunzawm a rinawm.