Italy record siam zan?

European champion Italy chuan zanin hian chak loh nei loa match khel tam ber record an siam thei dawn. Azzurri hian zanin dar 12:15 hian Mapei Stadium, Reggio Emilia-ah Lithuania an mikhual dawn.

Robert Mancini hote chak loh hnuhnun ber chu September 2018 daih tawh kha a ni a, Nations League-ah Portugal hmachhawnin Estádio da Luz, Lisbon-ah 1-0 in an tlawm. Goal awmchhun hi Portuguese striker Andre Silva khung a ni.

Azzurri hian Portugal laka an chak loh hnuah match 36 an khel leh tawh a, chak loh an nei lo. Euro 2020-ah England hnehin a champion a, World Cup qualifier-ah Bulgaria leh Switzerland nen an inhnehtawk leh bawk.

Italy hian kum 1993-1996 chhunga Brazil record vawi 36 hneh loh nei loa an kaltluang record chu an nihrual a, zanina Lithuania laka point an hlawh chhuak a nih chuan record thar an siam dawn.

Chutihrualin Mancini hoten match hnuhnung pahniha point hnih chauh an hmuh avangin Lithuania hi an hneh ngei a ṭul. Azzurri hnuai chiaha awm Switzerland-in match thum khelhah point sarih an hmu a, khelh zat inangah Italy chungah an awm thei ang.

Switzerland hian zanin dar 12:15 hian Northern Ireland an hmachhawn thung ang. Group C-ah ram panga Italy, Switzerland, Bulgaria, Nothern Ireland leh Lithuania te an awm a, vawi hnih inkhelh chhuah zawha a sang berin World Cup an khel dawn. Pahnih erawhin playoff an khel dawn a, playoff-ah hian ram 12 aṭangin ram pathum chiah an tling dawn.