Kyrgyzstan hmachhawn turin India inpeih

AFC Asian Cup 2019 khel turin India tling chiang tawh mah se zanin dar 7:30 hian qualifier match hnuhnung ber an khel dawn a, anmahni ang thoa inpet tling tawh Kyrgyzstan an lenchilh dawn–inkhel hi Star Sports 2 chuan live-in a pe chhuak ang.

Mahse, India tan 'inpet tling tawh' tih avanga inthlahdah a thiang dawn lo. Kyrgyzstan an hneh chuan FIFA ranking-ah an sang sawt ang a, hei hian January 2019-a khelh tur Asian Cup a tana draw neih hunah khingpui awlsam zawk a pe thei ang.

India squad-ah dan pangngaiin Jeje Lalpekhlua leh Jerry Lalrinzuala te an awm a, Lalruatthara chu koh zingah telin squad-ah koh lo ni tawh ṭhin mah se Kerala Blasters defender hi India tan a la inlan ngai lo.

Chhetri tel lohna
Hrem vangin India squad-ah captain Sunil Chhetri a tel lo a, Bengaluru FC striker awm loh hlanin goalkeeper Gurpreet Singh Sandhu chuan captain armband a hreng ang.

Chhetri awm loh vangin Jeje Lalpekhlua mawhphurhna a sang sawt dawn tihna a ni a, Hnahthial tlangval hian qualifier-ah India tan goal ruk a khung tawh–Indian Super League-a Chennaiyin FC-a champion puina kawnga goal kua khungtu striker lakah India beiseina a sang dawn.

Jeje tih loha India-in tlarhmaa player a neih langsar chu Balwant Singh a ni a, Mohun Bagan-a Jeje nena khel dun ṭhin striker hian ISL hman zawh takah khan Mumbai City tan goal ruk a khung.

Squad chu
India coach Stephen Constantine-a squad thlan danin sawisel a hlawh a, a mak hran lo. East Bengal defender Salam Ranjan Singh leh midfielder Mohammed Rafique te chu I League-a beisei phak lo an ni a, NorthEast United midfielder pahnih Rowllin Borges leh Halicharan Narzary lah ISL mawngphaha Highlanders awmpuitu an ni bawk.

Tlarhmaah rin loh takin NorthEast United forward Seiminlen Doungel, Shillong Lajong forward Alen Deory, FC Goa tana khel Manvir Singh leh ATK rawlthar Hitesh Sharma te koh an ni a, hei tak hian sawisel a hlawh lehzual.

Seminlen-a'n ISL hman zawh takah goal li a khung a, heti zat goal khung tura a match mamawh zat chu 16-a ni–striker hnathawh atan a chhuanawm loh hle. Hitesh Sharma-a'n ATK tana match 14 a khelhah goal khung leh assist a nei miah lo a, Manvir Singh-a'n league match kua khel mah se a minute zawnga chhutin season tluanin khelmualah 266 minute chiah hun a hmang a, goal khung a nei lo.

Inkhel pawimawhna
April 27-ah Asian Cup draw neih a ni dawn a, inelnaa tel tur team 24 chu pot li-ah ṭhen hrangin pot tinah team paruk zel chu FIFA ranking mila chhutin ṭhen hran an ni dawn. Chumi awmzia chu pot khatah ranking sang ho an awmkhawm zel ang a, draw neih a nih hnuah group stage-ah an aia ranking-a hniam zawk awmpuina chance a sang tihna a ni.

AFC ranking-ah point 339 hmuin India-in 13-na dinhmun an luah mek a, an chunga awm pahnih hi Lebanon (390 points) leh Iraq (406 points) an ni. April-a draw neih a nih hnuah ranking-a pasarihna aṭanga 12-na chu pot 2-ah an awm ho dawn a, India tan pot 2-a awmna chance sang tak a awm.

Khualmuala inkhel tur an nih avangin India hian ranking chhuak thar berah chuan point 422 an hmu dawn. Lebanon-in Malaysia hmachhawn ve dawn mah se mahni khelmuala inkhel tur an nih avangin hnehna an chang a nih pawhin point 404 chiah an nei ang a, Iraq-in Syria leh Qatar nen an inkhelah hnehna chang ve ve pawh ni se friendly match a nih avangin point 417 bak an nei lo ang.

Chumi awmzia chu India-in hnehna an chan chuan an chunga awm team pahnih an tlan pel ang a, Asian Cup 1964-a final an luh bak knockout round la lut ngai lo team-in group stage-ah ranking hniam zawk team an tum thei dawn tihna a ni.

Kyrgyzstan an ṭha em?
FIFA ranking lamah Kyrgyzstan hniam zawk mah se India aia 'chhe' zawka dah ngawt an harsa–an match hnuhnung bera 5-1 ngawta Myanmar sawp thei an ni a, Blue Tigers lo hneh turin he team hian theihna an nei.

Thawnthu hlui keu let erawh chuan White Falcons (Kyrgyzstan sawina) aiin India an ṭha zawk–vawi li an intawn tawhah India-in vawi thum hnehna an chang a, Kyrgyzstan-in vawi khat hnehna an chang ve thung.

Tun qualifier-a an intawn hmasak zawkah pawh India an chak a, Sree Kanteerava Stadium, Bengaluru-a inkhelah Sunil Chhetri goal hmangin 1-0 in hnehna an chang. Kyrgyzstan hian Asian Cup pawh an la khel ngai lo a, India laka inchhuang tur an ni lo.

Mahse maw...
Mahse, tih a ngai leh ṭhin. Soviet Union aṭanga phel Kyrgyzstan hian national football team kum 26 chauh an la nei a, tun hmaa record ropui an nei lo hi a awm hran lo–tun hnai an football team hi an ṭhatlai ber ang hiala ngaih an ni a, tawh an khirh dawn.

Tlarhmaa White Falcon chhuanvawr tur Anton Zemlianukhin hian qualifier-ah ringawt goal kua a khung tawh a, Mirlan Murzaev nena an inkawp tur hi Sandesh Jhingan hoa ding tur India tlarhnung tan fimkhur a fin thlak ang.

Uzbekistan Super League club Olmaliq FK tana khel mek Farhat Musabekov hi midfield-ah a khelh phawt chuan a hnawksak leh ngeiin a rinawm a, club lama Dordoi Bishkek tana inkawp Aziz Sydykov leh Islam Shamshiev-te hi midfield-a an inkawp fuh ni chuan hmuhnawm khawp an ni bawk.

Tlarhnungah Polish second division club GKS Tychy tana khel tawnhriat ngah Edgar Bernhardt leh Indonesian Liga 1 club Borneo tana khel captain Azamat Baymatov te inkawp hi sut tlang an awlsam dawn lo tih a chiang a, Jeje hoin India tlarhmain an hna an thawh ṭhat a ṭul ang.

GOALKEEPERS: Gurpreet Singh Sandhu (Bengaluru FC), Amrinder Singh (Mumbai City FC), Vishal Kaith (FC Pune City);
DEFENDERS: Subhasish Bose, Nishu Kumar (both Bengaluru FC), Sandesh Jhingan, Lalruatthara (both Kerala Blasters FC), Anas Edathodika (Jamshedpur FC), Salam Ranjan Singh (East Bengal), Jerry Lalrinzuala (Chennaiyin FC), Narayan Das (FC Goa);
MIDFIELDERS: Rowllin Borges, Halicharan Narzary (both NorthEast United FC), Dhanapal Ganesh, Anirudh Thapa (both Chennaiyin FC),
Udanta Singh (Bengaluru FC), Mohammed Rafique (East Bengal), Bikash Jairu (Jamshedpur FC);
FORWARDS: Balwant Singh (Mumbai City FC), Jeje Lalpekhlua (Chennaiyin FC), Seiminlen Doungel (NorthEast United FC), Alen Deory (Shillong Lajong FC), Manvir Singh (FC Goa), Hitesh Sharma (ATK).