Del Potro-a'n Nishikori a hneh

Juan Martin del Potro chuan a khelh ṭhat chhawm nung zelin Kei Nishikori a hneh leh a, tun hnaiah a zawnin match 13 chhung hnehna a chang ta. Argentine tlngval hian harsatna lian tham tawk loin Miami Open last 16 a inhlangkai.

Pathianni zan inkhelah Del Potro hian darkar khat leh minute 12 chhungin Japanese player lakah hian 6-2, 6-2 in hnehna a chang. Hard court hmang thiam player pahnih te danglamna chu Del Potro hi a ball vuak a nain service a nei ṭha a, hliam dam hlim Nishikori erawh nidanga a inkhel a la phak rih lo hle.

Kum 29 mi Del Potro hian kar hmasa khan Roger Federer hnehin Indian Wells-ah nomawi a chawi tawh a, a zawna ATP Masters title la thei turin a dinhmun a sawhnghet chho zel. Zanin hian seeded 22-na Filip Krajinovic nen an inkhel leh ang. Krajinovic hian Benoit Paire chu 6-3, 6-3 in a hneh ve bawk a ni.

Inkhel dangah US Open champion hlui Marin Cilic pawhin inkhel inhnehtawk takah Vasek Pospisil chu 7-5, 7-6 (7/4) in a hneh ve bawk. Kumina Grand Slam hmasa ber Australian Open semifinal thleng thei Chung Hyeon chuan harsa lo takin Michael Mmoh chu 6-1, 6-1 in a hneh ve bawk.

Kumin Miami Open-ah hian world number 1 Federer leh, Grand Slam vawi 12 champion tawh Novak Djokovic te an match hmasa berah an tla nghal. Rafael Nadal leh Andy Murray te chu hliam vanga an inlan theih loh avangin Del Potro leh Cilic te hi champion tura rinkai an ni.