Spain-a inkhel turin Mizo pali telna

Hong Kong-a khelh Jockey Cup International Youth Invitational Football Tournament-a an champion hnuah Mizo pali telna India Under 16 team chuan Spain-ah Mediterranean International Cup tournament khel turin Pathianni zan khan Hong Kong an chhuahsan lehnghal.

India U16 hian March 28-ah Swedish club IFK Stocksund nen match hmasa ber an khel nghal ang a, BCN FC leh Spanish club CEF SP Vidrerenca an hmachhawn chhunzawm ang. League round hi March 28-30 chhungin an khel zo ang a, March 30 leh 31-ah knockout round khelh tur a ni thung.

Blue Tigers naupang rual hian knockout round an lut a nih chuan khawvel huap pawha club langsar FC Barcelona, Manchester United, Sampdoria, Villareal CF leh Shakhtar Donetsk academy naupangte nen intawnna hun ṭha an nei thei ang.

India U16 team-ah hian Serchhip midfielder Eric Remruatpuia Chhangte, Lunglei goalkeeper Lalbiakhlua Jongte, Lengpui midfielder Lalrokima leh Armed Veng rawlthar Lalchhanhima Sailo te an tel.