England tan inbuatsaih vawi hnihna

June 14-ah World Cup khelh ṭan a ni tawh dawn a, World Cup khel tur ram ten inbuatsaih nan fimkhur takin an friendly match khelhpui tur an thlang a, player in enchhin nan an hmang hlawm.

England boss Gareth Southgate-a'n tuna an in enchhin loh chuan hun a tlem tawh tih hriain friendly match pahnih an neih atan a koh ngai loh player pali ngawt a ko a, match hmasa zawka Netherlands 1-0 a an hnehna inkhelah pawh player 17 a chhawr.

Three Lions hian zanin dar 12:30-ah friendly match khel turin Italy an mikhual leh dawn a, Southgate chuan, "Netherlands lakah kan khel ṭha a, mahse hmasawnna tur kan la neih avangin Italy-ah hei aia ṭha zawk ka beisei," a ti a, zaninah inkhel hmuhnawm phochhuah an tum.

A laiah pathum
Southgate-a'n England a enkawl hnuah defender pathum a tuipui tih a naute a remkhawm dan aṭangin a lantir fo tawh a, Netherlands lakah pawh 3-1-4-2 hmangin a hlawhtlinpui.

Dutch team lakah hian John Stones, Kyle Walker leh Joe Gomez chu tlarhnungah an awm a, Danny Rose leh Kieran Trippier te chu wing back-ah hman an ni. Jordan Henderson chu defensive midfield-ah awmin Alex Oxlade-Chamberlain chu Hendo pui turin a hma hretah a awm a, Marcus Rashford, Raheem Sterling leh Jesse Lingard ten goal an nawr.

Liverpool defender Gomez chu Netherlands lakah a inhliam avangin Harry Maguire tan Italy lakah inkhel bul ṭan chance a sang a, ram tana la inlan lo James Tarkowski hmel hmuh chance a sang.

Captain Hendo
England tan World Cup-ah Harry Kane chu captain tura beisei a ni a, Tottenham Hotspur striker inhliam laia captain armband hrengtu erawh Hendo a ni. Liverpool captain hian Netherlands lakah a khel ṭha a, a thawkrim a, hruaitu ṭha a nihzia hmuh turin a awm bawk.

Southgate chuan, "Jordan hi kan squad-a club tana captain ni thei kan neih tlemte zinga mi a ni a, pressure a zo a, mi kaihruai turin theihna a nei ṭha," tiin a fak - inkhel bul a ṭan leh ngei a beiseiawm.

Hetihlai hian hliam tenau avanga Netherlands-a hruai tel loh Arsenal midfielder Jack Wilshere chu dam hman tura beisei ni mah se Italy a hmachhawn thei dawn lo.

Formation ngai
Southgate-a'n khelh dan ngaiin a naute a khelh tir leh ngeiina rinawm a, player enchhin a duh miau avangin Netherlands laka inlan lo player a chhawr nualin a rinawm.

Dutch team nena an inkhelh ṭuma bench-a dah tluan Adam Lallana hmel kan hmuh a rinawm tawh a, West Brom midfielder Jake Livermore, Swansea City defender Alfie Mawson leh Bournemouth midfielder Lewis Cook te hmel hmuh a beiseiawm tawh bawk.

England si ban nghak tur hi hriat chakawm a ni bawk. Netherlands lakah Jordan Pickford-a'n goal a veng a, Everton keeper inringtawk tak hian Three Lions tan match hnih a khelh tawhah goal a chhuah lo ve ve. International level-a Joe Hart theihna hriatsa a ni a, in enchhinna a nih miau avangin Nick Pope-a'n a vawi khat nan Three Lions tan goal a veng a nih pawhin thil mak erawh a ni lo ang.