Aguero a chhuak dawn

Sergio Aguero chuan Manchester City tan a hun pum hman a tum loh thu a sawi. Tuna a contract neih lai a hman zawh hnuah Argentina lamah kir leh a tum.

Kum 29 mi Aguero hian kumin nipui thlen hmain kum 30 a pum dawn a, City tan hian kum 2020 thleng daih contract a nei mek. English club tan hian match 289 aṭanga goal 199 khung tawhin, ani aia khung hnem an awm lo.

Argentina international Aguero chuan, "Man City tana ka contract hi 2020 thleng daih a ni a, chumi hnuah chuan Independiente-ah ka kir ang," tiin a bulṭanna hmunah a kir leh tur thu a sawi.

Aguero hian an ram club Independiente aṭangin a football nun bul a ṭan a, chumi hnuah Atletico Madrid a zawm. Spanish club tan hian season nga chhungin goal 101 a khung hnuah 2011 khan Etihad Stadium a pan, khawvel striker hriam berte zinga mi a ni.

Tun dinhmunah Aguero hi a khup hliam vangin a chawl mek a, an league match hnuhnung bera Stoke City an hneh ṭum pawhin a inlan lo. Ram tan training-na hmunah inlan ve mah se a inkhel lo a, kar tawpa City-in Everton an hmachhawn hunah chuan a inlan theih beisei a ni.

Pep Guardiola kaihhruaina hnuaiah Aguero hi player pawimawh leh rinrawl a ni mek. Premier League bikah goal 21 a khung tawh a, an match khelh hmabak pahnihah Everton leh Manchester United an hneh thei a nih chuan league nomawi an chawi ang.

Amaherawhchu, City hna hi a awlsam dawn lo. Everton leh United an hmachhawn karlakah hian Champions League quarterfinal khel turin Liverpool chu Anfield-ah an lenchilh a ngai dawn. January thla khan Reds hian City chu 4-3 a hnehin hneh loh nei loa an kaltluang lai an tih tawp sak tawh a ni.