Neymar tel loin Germany tlawh dawn

Zanin dar 12:15 hian Olympiastadion Berlin-ah Germany-in Brazil an mikhual dawn. Khawvel player manto ber Neymar tel loin Brazil an inlan dawn a, PSG star tel lo hian FIFA World Cup 2014 khan Selecao hi an khawtualah an mualpho a, Die Mannschaft hian 7-1 in an sawp.

Belo Horizonte-a World Cup semifinal khelh a nih ṭum hian Toni Kroos chuan goal hnih a khung a, Real Madrid midfielder chuan, "Tuna Brazil team leh kum 2014-a team pahnih te kha kan khaikhin a nih chuan grade hnihin hma an sawnin ka hria. Player thar an chhuak a, chung zingah chuan club tana ka khelhpui Casemiro pawh a tel. World Cup-ah pawh champion rinkai an ni chiang a ni," tiiin an khingpui tur a fak.

World Cup-ah hian inhliam vangin Neymar a tel lo a, tun ṭumah pawh inhliam vang bawkin a tel dawn lo. Amaherawhchu, Brazil hian an captain tel loin kumina World Cup thlengtu tur Russia chu 3-0 in an Luzhniki Stadium-ah Zirtawpni khan an hneh a; Miranda, Philippe Coutinho leh Paulinho ten goal an khung.

Germany pawhin Spain mikhualin 1-1 in an inhnehtawk a, Die Mannschaft hian EURO 2016-a France hneh loa an tlak hnuah match 22 chhung chu hneh loh nei loin an kaltluang leh tawh a ni.

Coach Joachim Low chuan, "Spain hi Europe-a team ṭha ber zinga mi an ni a, tawnhriat ṭha tak an nei a, thil thlen dan a zira inthlak dan an thiam. Chuvangin team ṭha hmachhawn hi World Cup atana inpuahchahna ṭha tak a ni," tiin friendly match an chhawr ṭangkai thu a sawi.

Germany hian Thomas Muller, Mesut Ozil leh Emre Can te chu Brazil hmachhawn tur zingah an tel lo a, Sebastian Rudy rawn tel leh thungin Low-a'n player enchhin nan hman a tum.

Die Mannschaft boss Low chuan, "Marvin Plattenhardt thlan ka tum a, Ilkay Gundogan leh Leroy Sane te pawhin bul an ṭan ang. Inkhelh laiin susbtitution a la siam theih bawk," tiin player enchhin nana hman a tum thu a sawi.

Gundogan leh Sane te Manchester City tana an khelh avangin player lar an ni tawh a, Hertha BSC left back Marvin Plattenhardt erawh kum 26 mi ni tawh mah se lar tur khawpin hming a la chher tawk lo. Kum 2009 khan Mario Gotze te ho nen 2009 UEFA Euro U17 C'ship-ah an champion a, nikuma Germany-in FIFA Confederations Cup an champion ṭum khan squad-ah a tel bawk.