Harsa takin Venus a chak

Miami Open vawi thum champion tawh Venus Williams chuan, a khingpui Key Biscayne lakah match point vawi thum ngawt a inchhanhim hnuah 5-7, 6-3, 7-5 in hnehna a chang let a, harsa takin last 16 a lut.

Pathianni zan inkhelah kum 37 mi Venus hian set hmasa berah 5-0 ngawtin hma a hruai thei a, world number 29 Biscayne hmaah harsa lo takin hnehna a chang ngei dawn niin a lang hman. Mahse, Venus hian a zawna game nga ngawt hlohin 7-5 in set a hloh.

American nula hian a tawnhriat chhawr ṭangkaiin awlsam angreng takin set hnihna a la a, set thumna la tur erawhin vanneihna a mamawh tel. Grand Slam vawi sarih champion tawh hi 1-4 ngawta a hnufual hnuah ropui takin a tho chhuak thei a ni.

Venus chuan, "A chang chuan beisei anga khelh loh chang a awm a, point hnuhnung ber hmuh thlengin kan beidawng thiang lo. Hei tak hi tennis game ka ngainat chhan pawh a ni," tiin a sawi.

World number 8 Venus hian last 16-ah chuan champion lai Johanna Konta a hmachawn leh dawn. Britain nula hian darkar khat leh minute nga chhungin Belgian nula Elise Mertens 6-2, 6-1 in a hneh ve bawk.

Seeded 11-a Konta chuan, "He hmunah hian ka tana nomawi lian leh hlu ber ka chawi tawh a, ka ngaina hle a ni. Kuminah pawh hlim taka hun ka khar leh theih ngei ka beisei," tiin a sawi.