Santosh Trophy-ah Mizoram an la tla thei em?
Santosh Trophy vawi 72-naah Mizoram chu semifinal lut tawh angin national media thlengin tarlan a ni a, nimin result avangin hei hi a dik tawk lo.
Nimin khan Punjab-in Howrah Stadium-ah Karnataka 2-1 in an hneh avangin Group B a ngaihnawm thar - match hnuhnung ber inkhel result a zirin Mizoram hi tla thei an la ni ve tho.
Hei chauh hi a ni lo, tla mai tura ngaih tawh Goa chuan Orissa 6-1 a sawpin semifinal lut turin nunna thar an nei leh ta bawk!
Mizoramin point kua an hmu a, Karnataka leh Punjab-in point ruk an hmu a, Goa-in point thum an hmu. March 28-ah Mizoram leh Karnataka an intum ang a, Goa leh Punjab an inkhel ang.
An intluk tawk
Nimin inkhelah hian Karnataka-in minute 9-na lekah Rajesh S hmangin hma an hruai a, semifinal lut turin an dinhmun a ṭha hman hle.
Amaherawhchu tlar hnung tihsual vangin Punjab-in Jitender Rawat leh Baltej te hmangin first half-ah an lehthal a, team pahnih an intluk tawk avangin chetsual a pawi. Karnataka-in nawr let na mah se Punjab lamin hun an khawhral nasa a, an sut thei tawh lo.
Goa an ṭhanharh a, 6-1 zetin hnehna an chang. Group B team pali Mizoram, Punjab, Karnataka leh Goa te an intluk tawk tih a lang.
Goa tlin theih dan
Beisei tur nei tawh lo Odisha-in khelh tur an nei tawh lo a, group match hnuhnung bera khel tur team pali hian beisei tur an la nei vek.
Goa hian an match hnuhnung bera Punjab an hneh a, Mizoramin Karnataka an hneh sak bawk chuan team pathum Goa, Punjab leh Karnataka ten point ruk vek an hmu dawn. Santosh Trophy danah goal difference chu en tur a ni a, Goan coach Armando Colaco hote hi 2-0 china an chak chuan semifinal an lut thei ang.
Mizoram tlak theih dan
Mizoram hian match thum khelhah chak vekin point 9 an hmu tawh a, an hnuaia awm Karnataka leh Punjab ten point ruk ve ve an hmu tawh.
Group match hnuhnung berah Mizoramin Karnataka an hmachhawn dawn a, Punjab-in beisei tur la nei Goa nen an inkhel dawn. Karnataka leh Punjab ten hnehna an chang a nih chuan Mizoram nen an pathumin point kua vek an hmu ang.
Karnataka hian goal thum china a hneh chuan Mizoram aiin an goal difference a ṭha dawn a, hmahruaitu aṭangin pahnihna an ni ang.
Inkhel dangah Punjab-in goal nga china Goa an hneh leh bawk chuan Mizoram aiin an goal difference a ṭha leh ang a, Lalsangzuala Hmar hote hi pathumnaah an tla thla leh ang.
Mizoram hi semi final lut tawh anga ngaih ni hman mah se, nimin inkhel result aṭanga thlirin goal thum aia tama an chak loh a, Punjab-in Goa an hneh bawk chuan Mizoram hi chhiarkawp dana tla thei an la ni.