Zaninah point mamawh ITI inlan dawn

Tualchhung volleyball inelna lian leh ngaihhlut ber Pro Volleyball League chu zanin dar 8:00 hian R. Dengṭhuama Indoor Stadium-ah second round khelh ṭan a ni dawn a, kai thar pahnih Durtlang North leh ITI Veng an inkhel dawn.

Volleyball ngaina ITI Veng hian inelna lian an hmachhawn vawi khatna a ni a, an phur vanglai a nih avangin ṭantu pawh an nei ṭha. Mahse, an match hmasa berah champion lai leh team ṭha Hunthar Veng an hmachhawn a, a vanduai zawkah an ṭang.

Hunthar lakah ITI Veng tan Lalnuntluanga Renthei chuan rintlak a nih zia a lantir a, captain C. Lalnunpuia leh a hming anpui C. Lalnunpuia te pawh an ṭangkai hle. Mizo hlanga khel team hian hnehna chan theih nan chuan thawhhona ṭha lehzual an mamawh.

Kai thar team dang Durtlang North-in an match hmasa berah Tuichangral 25-20, 38-36, 25-17 in an hneh. Durtlang North hi team ṭha tak tia sawi tur an ni rih lo. Mahse, MVA hnuaia inelna hrang hrang hmachhawn tam tawh an nihna an chhawr a, hun harsa paltlang turin huaisenna an nei a ni.

PVL-ah hian team paruk an inlan a, an inkhelh kual vek hnuah a sang pali ten semifinal an khel dawn. Vawi khat ṭheuh an khel tawh a, champion lai Hunthar Veng bakah TNT leh Durtlang North ten point thum an nei tawh. Nilaini leh Ningani zanah match khelh chhunzawm a ni bawk ang.