Judgement Day ; Mizoram Vs Karnataka; Goa Vs Punjab
Santosh Trophy vawi 72-naa semifinal lut tur chu vawiin hian a hriat kim dawn. Group B-ah vawiina inlan tur Mizoram, Karnataka, Punjab leh Goa te chu beisei tur la nei vek an ni a, hei vang hian group stage kharna hi a ngaihnawm ang.
Mohun Bagan Stadium-ah Mizoramin an hnuai chiaha awm Karnataka te an inkhel dawn a, Howrah Stadium-ah Goa leh Punjab an inkhel dawn. Mizo mipui tana hriat nuam chu team pali zingah Santosh Trophy-a record nei chhe ber Mizoram dinhmun a ṭha ber.
Engtin maw?
Santosh Trophy-ah Punjab hian vawi riat nomawi an chawi tawh a, Goa hian vawi nga an chawi ve tawh bawk. Team pahnihin final an luh zat phei chu vawi 28 zet a ni. Amaherawhchu vawiinah chuan team pahnih hi vawi khat chauh la champion Mizoram kutah an awm.
Inelnaah hian point inangah goal difference chu en hmasak tur a ni a, chumi zawhah an goal khung zat en leh tur a ni a, hemi zawhah chuah hian head to head en a ni dawn. Hei vang hian goal difference 3 nei tawh Karnataka-in Mizoram an hneh a nih chuan Punjab leh Goa tan semifinal beisei ngam a har tawh ang.
Chutihrualin vawi li champion tawh Karnataka tan ngaih ṭha taka awm tur tihna erawh a ni lo. A chhan chu Mizoram coach Lalsangzuala Hmar chuan, "Semifinal-a kan khingpui tur hi kan buaina lam a ni lo a, keini chuan kan khingpuite hneh zel hi hneh kan tum a ni," tiin Vanglaini a hrilh a, result awm tawh chin aṭanga thlir chuan Mizoramin hnehna an chan a rinawm a, Karnataka tan pathumnaa awm hi thil theih a ni.
Buaina awm!
Santosh Trophy-ah hian match hranga vawi hnih hmuh chuan match khat hrem tur a ni a, tun dinhmunah Mizoram player pasarih–captain Lalrinchhana Tochhawng, F. Lalrinpuia, Lalromawia, MS Dawngliana, V. Lal-
ṭanpuia, Hmingthanmawia leh Lalremruata ten yellow card an hmu tawh a, khelh hma bakah semifinal leh final a la awm avangin coach Lalsangzuala Hmar tan ngaihtuah uluk a ngai khawp ang.
Hei bakah hian Under 21 player pathum chu playing eleven-ah an awm ngei a ṭul a, yellow card hmu tawh zingah Romawia leh Hmingtea te hi U21 player an ni. Coach Sanga chuan, "Chak kan duh a, kan fimkhur erawh a ṭul hle. Semifinal-a kan ṭhat dan bera kan inlan theihna turin ruahmanna kan siam a ngai a, player kan siksawi ve deuh chu a ṭul dawn a ni," tiin a sawi.
Mizoram hian hnehna chan an tum a nih chuan Karnataka forward Rajesh S an ven uluk a ṭul dawn a ni a, ani hian match tinah goal a la khung vek a. Bengaluru club Ozone club midfielder Gunashekar Vignesh pawh hun siam sak loh a ṭul ang.
Besei tur la nei Goa
India team pawh enkawl tawh Armando Colaco chuan, "Tun ṭuma kan champion loh chuan Santosh Trophy-ah hian kan champion leh lawk tawh lo ang," tiin inelna ṭan hmain a sawi a, amaherawhchu an match hmasa berah Mizoram 3-1 in an hneh lo a, Karnataka lakah 1-4 in an tlawm leh bawk.
Goa hi tla tura dah an ni a, amaherawhchu an match hnuhnung berah Odisha 6-1 in an hneh a, an khingpui tur Punjab-in Karnataka hnehin beiseina thar an nei ve chiah bawk. Punjab leh Goa inkhel hi a hmuhnawm dawn a, Goa hi nikum finalist an ni a, Punjab hi 2015 finalist an ni.
Tuin nge semifinal lut dawn?
Mizoram
An chak lo a nih pawhin Karnataka lakah goal thum aia tlema an chak lo a nih chuan an tling tho ang. Goal thum chin pawhin chak lo ta se Punjab-in goal nga china Goa an hneh zo lo a nih chuan an la tling tho ang.
Mizoram hi an tla dawn a nih chuan Karnataka-in 3-0 china Lalsangzuala Hmar hote hi an hneh a ṭul bakah Punjab-in 5-0 a Goa an hneh a ngai bawk tihna a ni.
Karnataka
Karnataka hian Mizoram 3-0 a an hneh chuan result dang ngaihchan ngai loin semifinal an lut ang. Mizoram an hneh theih hrim hrim pawhin Karnataka dinhmun a ṭha a, Punjab tan semifinal lut tur chuan goal thum tala chak a ngai dawn.
Punjab
Mizoram kutah Punjab hmalam hun a awm tihin a sawi theih a, Lalsangzuala Hmar kaihhruai team hian Karnataka laka point an hlawhchhuah chuan Punjab hian Goa hnehin semifinal an lut dawn. Amaherawhchu Mizoram hi an match hnuhnung bera an chak lo a nih chuan Punjab hmabak a harsa khawp ang.
Goa
Goa-in Punjab aiin Mizoram ṭanpuina an mamawh zual a, Mizoramin Karnataka an hneh loh chuan an beisei a tawp nghal. Chutihrualin Mizoramin hnehna an chang a nih thung chuan goal hnih china hnehna an chanin Goa hian semifinal an lut thei ang.
Group B Thlirna
March 28, Nilaini
Mizoram 3:00 PM Karnataka
Goa 3:00 PM Punjab
# Team Pld W D L GF GA GD Pts
1 Mizoram 3 3 0 0 10 2 8 9
2 Karnataka 3 2 0 1 7 5 2 6
3 Punjab 3 2 0 1 5 4 1 6
4 Goa 3 1 0 2 8 8 0 3
5 Odisha 4 0 1 3 3 15 -12 1