A mawng berah Manipur

Manipur chuan nimin khan Maharashtra 7-2 in an hneh lo a, Santosh Trophy vawi 72-naah NorthEast aiawh team hian chak hmel hmu loin table mawngphahah an awm. Group B hmahruaitu inchuhnaah Kerala-in inelna thlengtu West Bengal chu 1-0 in an hneh a, an khingpui hneh vekin pakhatna an ni.

West Bengal hian pahnihna nichunga group stage an khar avangin semifinal-a Mizoram nen an inkhelh ngei a rinawm a, an intawng fuh a nih chuan 2017 semifinal rematch a awm dawn tihna a ni ang. Nikuma Goa-a inelna neih a nih ṭum khan West Bengal hian penalty-ah Mizoram hi an hneh a, an champion zui a, Mizoram erawhin 2014-a an champion hnuah final an la lut leh lo.

An mualpho e
Howrah Stadium-a inkhelah Manipur-in Chanso Horam (16') leh Dhananjoy Singh (42') te hmangin ṭum hnih hma hruai mah se Maharashtra-in Sahil Bhokare (28') leh Ranjeet Singh (65') te hmangin an sut ve ve.

Hming ṭhat inchuhna inkhelah Maharashtra an ṭang rei thei zawk a, Manipur-in hun tawp lamah an tha an thlah avangin goal sarih zet an chhuah. Ranjeet Singh chuan goal hnih dang khung belhin hattrick a siam a; Nikhil Prabhu, Kiran Pandhare leh Mohammed Ansari ten goal khat ṭheuh an khung belh.

Manipur club Neroca-in I League an vawi khat khelhnaah pahnihna hial ni pha mah se Santosh Trophy-ah Manipur-in result an neih ṭhat phah lo. Group A-ah Manipur hi Kerala, West Bengal, Maharashtra leh Chandigarh nen an awm ho a, match li an khelhah goal thum chiah khungin goal 17 zet an chhuah.

West Bengal an tlawm
West Bengal coach Ranjan Chowdhury chuan goal khat chauha Chandigarh an hneh ṭumin an khelhna hmun Mohun Bagan Ground chu nasa takin a sel a, he ground-ah bawk hian Kerala an hneh lo.

Nimina inkhelhah hian goal a lut tlai a, match hnuhnung pahniha goal khung tawh Rahul KP chuan minute 87-naah chakna goal a khung a, a zawnin match thumah goal a khung ta. Santosh Trophy-a vawi nga champion tawh Kerala hi an la chak vek avangin champion rinkaiah an dah theih ang.