World Cup 2026 a 'fair' tawk - Infantino

FIFA president Gianni Infantino chuan World Cup 2026 thleng tur zawnna chu lang tlang leh dik taka tih a nih thu a sawi a, a dik lohna hmu an awm chuan ding chhuak turin a ti!

Russia-in kumina World Cup an thlen tur leh Qatar-in 2022-a an thlen tur chungchangah thamna leh vote lei a tam tih tun hnaiah hmuhchhuah a nih avangin football khawvela thuneitu sang ber FIFA a hming chhia a, hei vang hian tun hma ang mai mai an ni tawh lo tih lantir nan Infantino hi a ṭawng chhuak a ni.

World Cup 2026
Canada, Mexico leh USA football association te chuan ṭangkawpin World Cup 2026 hi thlen an dil a, Moroccan Football Association chuan thlen dilna an thehlut ve bawk - kum 2020-ah 2026-a inelna thleng tur hi tihchian a ni ang.

World Cup 2026-ah hian a vawi khat nan team 48 an tel dawn. FIFA pawm dan chuan team 48 hi group 16-ah ṭhen hran an ni ang a, group khatah team pathum zel awmin a sang pahnihin last 32 an lut dawn a ni.

Hmingchhiatna
December 2010-a 2018 leh 2022 World Cup thleng tur hriat a nih khan mi tam takin FIFA an ringhlel nghal a, thamna leh vote lei vangin FIFA hotu engemaw zat zingah thubuai nei an awm a, heng zingah hian FIFA president hlui Sepp Blatter a tel.

BBC-in an chhui chiannaa a lan danin Qatar chuan 2022 World Cup thleng tur khan pound maktaduai 117 ngawt an inseng a, FIFA president hlui Sepp Blatter chuan kumin World Cup thleng tur zawnnaah khan vote lak a nih hma hauhin engkim a chian thu a lo sawi tawh bawk.

Min ring rawh u!
FIFA president Gianni Infantino chuan, "A tir aṭangin engkim chiang takin kan ti a ni. A dik thei ang bera engkim a kal theih nan ruahmanna fel tak siam a ni a, hmana kan hming chhiatna angah khan kir leh kan duh tawh lo," a ti.

Swiss pachal chuan, "FIFA hi World Cup thleng tur a thlanna kawngah nasa takin sawisel a lo ni tawh a, kan hun thim lo tawn tawh aṭanga inzir kha kan duh a, rinhlelhna pakhatmah awm lo se kan duh a ni," tiin hma an lak nasat thu a sawi.