Ronaldo leh Portugal nâutu Netherlands

Cristiano Ronaldo-a'n match kua zet a zawna goal a khungna chu tihtawp sakin a awm a, Portugal mualphona a ni tel nghal bawk.

European champion hian Egypt an hneh hnuah Thawhṭanni zan khan Netherlands an mikhual a, 3-0 in an tlawm.

World champion nih tum Portugal tan inenfiahna ṭha tak a ni a, Netherlands-in World cup khel dawn lo mah se an la ṭha reng tih an pholang bawk.

Netherlands = goal
Dutch team-in Ronald Koeman enkawlna hnuaia an match hmasa berah England chu 1-0 in an ngam lo a, European champion team lakah erawh an insiamṭha chiang hle.

Netherlands tan Premier League-a kan hmuh tawh ṭhin player an langsar a, minute 11-na lekah Manchester United winger hlui Memphis Depay chuan goal hmahruai a khung nghal.

Minute 32-na a ni a, Liverpool player hlui Ryan Babel chuan an goal hnihna a khung ve leh a, first half hun pek belha goal khungtu pawh Virgil van Dijk a ni - Liverpool defender hi Netherlands captain thar a ni.

Ronaldo = NIL
Minute 68-naah Ronaldo thlak turin Monaco midfielder Joao Moutinho tlan luhtir a ni a, Portugal captain tan match kua chhung a zawna goal a khungna chu a tawp tih hei hian a lantir bawk.

Ronaldo-a'n match kaw chhung hian goal 19 a khung hman a, heng zinga goal 17 chu Real Madrid tan niin goal hnih dang erawh Portugal tan a ni - Egypt nena an inkhelah goal hnih a khung.

Match khat goal khung loh vangin Portugal ṭantute tan hnual lutuk tur erawh niin a lang lo. Ronaldo hi season ṭantirah goal khung a harsat vanga a chuai tawh nia an sawi kha a ni a, vawiina a stats en erawh chuan match 41 aṭangin goal 43 a khung leh der tawh.

Engtinnge Portugal?
Portugal-in Euro nomawi an chawi tawh a, an hmabak chu World Cup a ni. Ronaldo chungah rinna nghah ngam a nih thu tarlang mah ila Real Madrid forward 'nil' zana mawhphurhna chelh zo he team hian an mamawh.

European champion hian Egypt laka chak tur pawhin injury time-a Ronaldo goal hnih an mamawh a, Netherlands lakah goal thum an chhuah leh ta bawk. An friendly match hnuhnung pahnih aṭanga tehin world champion ni tura beisei chu thil har tak a ni.

Portugal hi Group B-ah Spain, Morocco leh Iran te nen an awmho a, last 16 lut tur pawhin an beih fe a ngai dawn tih a chiang - Coach Fernando Santos-a'n World Cup hmain insiamṭhat an mamawhna lai a hmuhchhuah vat a ṭul ang.

Santos a inthiam lo
Portugal-in first half-ah goal thum an chhuah fel der tawh a, minute 61-naah Joao Cancelo hnawhchhuah a nih bawk avangin minute 90 a nih hma hauhin chak tur a chiang tawh.

Portugal coach Fernando Santos pawhin an chak loh chhanah chhuanlam a zawng duh lo a, ama thiam loh a nih thu a sawi. Kum 63 mi manager chuan, "Kha aia ṭha zawka hnathawk thei kha ka ni a, ka thiam loh a ni," a ti.

Netherlands boss Ronald Koeman erawhin kalphung thar an ruahman thu sawiin, "Hun rei tak chhung kan lo hman tawh kan khelh dan phung thlak kan rel a, tunah chuan ka player-te pawhin kan khelh dan hi an hrethiam tawh a ni," tiin hma an sawn zel thu a sawi.