Gold lak a har dawn - Chong Wei

Commonwealth Games chu Australia-ah April 4-15 chhung hian khelh a ni dawn a, badminton men's singles-ah Lee Chong Wei chu gold medal tura rinkai ni mah se Malaysian shuttler hian naupang ṭha zawk an chhuah tam avanga gold lak a har tur thu a sawi.

Kum 35 mi Chong Wei chuan, "Commonwealth Games hi Malaysia tan a pawimawh a, Olympic Games dawta ka dah a ni. Tun ṭum hi ka khelh tawpna tur a ni a, gold medal lak ngei ka duh - chutihrualin ka khingpui turte hian lak an tir harsa dawn a, a bik takin player naupang zawk khelh an har ang," tiin a sawi.

2006 Melbourne leh 2010 New Delhi ah te khan Chong Wei hian singles leh mixed team-ah gold medal a la a, amaherawhchu kum li liam taa Glasgow-a neih a nih ṭumah erawh Badminton Association of Malaysia (BAM)-in an player a thawnlet avangin medal a la lo a, kum 1990 hnua Malaysia-in men's singles-a gold medal an lak loh vawi khatna a ni.

Chong Wei chuan, "Elpui tur lian tham chu an tam lo a, mahse India-in player an nei ṭha a, lak thutak a ṭul," tiin a sawi. Malaysian shuttler hian a elpui tura ngaih Prannoy chu vawi hnih hneh tawhin vawi hnih tho a hneh lo a, Commonwealth Games-a inlan tur dang Kidambi Srikanth (4-0) leh Rajiv Ouseph (6-0) te lakah erawh a chungnung hle.