Parker hmachhawn tur Joshua a ṭawng pawr

March 31 khian khawvel ngaihven boxer rothap pahnih Anthony Joshua leh Joseph Parker an inhmachhawn dawn a, Anthony Joshua chuan a dan pangngaia hnehna a chan tur thu a sawi leh ta.

Kum 28 mi Joshua hian WBA leh IBF world heavyweight kawnghren a kawl mek a, a hmachhawn tur Parker hian WBO kawnghren a kawl thung - kawnghren pathum hi an inchuh dawn.

Joshua chuan, "Heavyweight boxer pahnih la tlawm ngai lo intawng tur kan ni a, hriat reng tur a ni tawh ang. He hmunah hian inhnek tura ka lokal a nih chuan thisen a chhuak dawn tihna a ni. Inhnek vawi 20-ah ka chak tawh a, chutiang bawk chu beisei rawh u," a ti!

British boxer hian inbuatsaih nan amah ang thoa Britain boxer Lennox Lewis inhnek video a en thu a sawi a, Lewis hian 2000 khan IBF, WBA leh WBC title a rualin a lo kawl tawh a, ani hnua title pathum a ruala kawl vek thei chu Tyson Fury leh Wladimir Klitschko chiah an ni.

Joshua leh vawi 24 inhnek a hmachhawna la chak vek Parker te inhmachhawnna tur hmun hi Cardiff khawpuia Principality Stadium a ni a, mipui 80,000 vel talin inhnek an en a rinawm.

Vawi 20 inhnek a hmachhawna a khingpuite la knockout vektu Joshua hian he stadium-ah hian vawi li inhnek lo hmachhawn tawhin, "Mipui heti zata tam hmaa inhnek hi ngai neih harsa tak a ni," tiin a ropui zia a sawi a, New Zealander boxer Parker pawhin ropui a tih ve ngei a rin thu a sawi.