Commonwealth Games-ah Mizo pahnih Remsiami leh Chhanhimi inlan dawn

Ram hrang hrang 71 zet inelna tur 2018 Commonwealth Games chu April 4-15 chhung hian Gold Coast, Queensland, Australia-ah neih a ni dawn. India-in infiammi 221 zet a tir dawn a, heng zingah hian Mizo nula Lalremsiami leh Lalchhanhimi te pawh an tel.

Hockey player Lalremsiami'n nizan khan Delhi chhuahsanin Australia a pan a, Weightlifting huanga inlan tur Lalchhanhimi'n inelna hmun tur a thleng tawh thung.

India team-ah hian infiammi bakah coach 58, doctor leh physiotherapist 17, manager pasarih leh official 22 an tel a, an vaiin 325 an ni.

Siami (Hockey)
Hmeichhe hockey team, player 18 koh zingah kum 17 mi Lalremsiami hi a naupang ber a ni. Thenzawl Women Hockey Training Centre aṭanga zir chhuak Siami hi 2016 khan India U-18 Asia Cup team-ah a tel a, nikum thleng khan junior player a la ni.

India junior team hian nikum khan Bangalore-ah training an nei a, training-na hmuna a chetla hmutu India coach Harendra Singh chuan forward Siami hi Senior team zinga khel tlakah ngaiin a ko a, a tisual lo chiang hle.

Kolasib nula Siami hian nikum khan India chu Asian Cup-ah a champion pui a, hemi ṭum hian match zawng zawngah inlan vekin goal hnih a khung. A theihna a san em avangin senior team-ah hmun a chang chhunzawm a, thla hmasa khan Korea-ah tour neiin, he hunah pawh hian match nga an khelah inlan vekin goal thum a khung leh bawk.

February thla tawp khan India aiawh tur hi puan a ni a, Mizo tleirawl duhawm Siami hming a lang. Siami chuan, "Tournament pui tham ka vawi khat khelhna tur a ni a, ka phurin a hlim pawh ka hlim. Selection an puan phei kha chuan room-ah ka lut a, khumah ka zuang vel. Pathian hnenah lawmthu ka sawi mawlh mawlh.

"Tuna kan team dinhmun en hi chuan inrintawkna ka nei ngah hle. Ka theihtawp chhuah ka tum a, inkhelh ka chak tawh takzet, a huphurh zawng chuan khawi ram mah hi ka huphurh bik lo," tiin Vanglaini a hrilh. India hmeichhe team hi Pool A-ah Malaysia, England, South Africa leh Wales te nen an awmkhawm.

Chhanhimi (Weightlifting)
Indian Weightlifting Federation chuan mipa leh hmeichhe player pariat ve ve Australia-ah a tir a, an zingah Mizo nula Lalchhanhimi a tel. Khawzawl Darngawn nula hi 90kg category-ah a inlan ang.

Chhanhimi hian 2007 aṭang khan weightlifting hi a luhchilh a, SAI Mission Vengthlang aṭanga bul ṭanin zawi muangin hma a sawn chho zel. A theihna a san bakah a tum a ruh a, 2012 khan Junior National weightlifting championship-ah bronze medal lain bul a ṭan a, he ta ṭang hian hma a sawn chho zel.

Kum 2015 khan Chhanhimi hian 35th National Games leh Senior National-ah silver a la. 2016 khan Senior National-ah gold medal a la - hetih hunlai hi chuan 69kg category-ah a la inlan ṭhin.

Weightlifting weight category siam thar dan chuan - 48kg, 53kg, 63kg, 69kg, 75kg, 90kg leh +90kg te an ni. Chhani hi nikum June vel kha chuan 75kg bawr vel a ni a, amah hrechiangtu coach-ten 90kg a chawi hian medal dawn theihna kawng a awm zawk an beisei avangin a weight chungah an awm chhoh tir.

Nikum March thla aṭang khan Chhani hi India camp-ah a awm a, Commonwealth Games hmachhawn tur hian ngawrh takin inbuatsaihna an nei. Chhani chuan, "Inelna lian a ni a, ram tan theihtawp kan chhuah ang. Mizo mipui zawng zawngte min lo ṭawngṭaipui turin ka ngen," tiin Vanglaini a hrilh.

Tun hnaiah Mizo weightlifter Jeremy Lalrinnunga leh Zakhuma te chu kum bithliah inelna hrang hrangah India tan an inlan deuh ziah. Mahse, Govt. Complex rawlthar pahnih hi senior huangah an la inlan loh avangin Commonwealth Games-ah an la inlan thei rih lo a ni.

India team
Commonwealth Games vawi 21-naah hian infiamna hrang hrang 19 a awm dawn a, medal 275 sem chhuah a ni ang. India hi inelna 18-ah a inlan dawn a, Athletics (31) leh Shooting (27) bikah hian infiammi tirh tam theih ber zat a tir thei.

Infiamna huang hrang hrang zingah badminton chu medal dawn theihna tur langsar nia ngaih a ni. World number 2 Kidambi Srikanth leh number 3 PV Sindhu te an inlan dawn a, badminton shuttler pahnih te hi inelna hawnna neih hunah hnam puan zar kengtu (flag bearer) an ni ang.

Australia hian Commonwealth Games hi a vawi nga thlenna a ni a, inelna hnuhnung ber 2014-a an telh judo inelna chu paih niin, basketball, women's rugby seven leh beach volleyball te chu a vawi khat nan telh a ni thung. British (Kumpuinu) ram awp tawh hrang hrangte infiamna khawmpui lianah hian motto atan "Share the Dream" tih hman a ni.