Indian Super Cup ; ISL club ten an ngai hlu tawk lo?

All India Football Federa­tion-in Indian Super League leh I League club-te inelna tur Super Cup a vawi khat nan a huai hawt dawn a, I League club-te ngawrh taka an inbuatsaih laiin Indian Super League club te erawhin an ngaihlu tawk lo niin a lang.

March 31-a neih tur inelna hi Kalinga Stadium, Bhubaneswar-ah khelh a ni dawn a, ISL leh I League-a table chung lam paruk chin ve ve leh qualifier aṭanga inpet kai club pali an intawng dawn - qualifier aṭang hian ISL leh I League club pahnih ve ve an inpet kai.

Super Cup-a inpetkai chin team 16-te hi April 6 thleng an inkhel dawn a, hei hi knockout round a ni. Aizawl FC leh Benga­luru FC-in AFC Cup an khelh dawn avangin quarterfinal khelh hun tur tihchian theih a la ni lo a, semifinal hi April 16 7 17-a khelh tura tihchian tawh niin April 20-ah final khelh a ni ang.

Hlu tawk lo?
ISL leh I League season ṭan a nih hma aṭang tawhin Super Cup hi sawi rik a ni tawh a, a tirah tak chuan league pahnih china palina ve ve intawngin champion tan AFC Champions League khelha a chak lo zawkin AFC Cup khelh tur angin sawi a ni.

Hetianga boruak a rik ret ret lai chuan Super Cup hi awm ngei se fans pawhin an duh a, en pawh an chak. Mahse, season

ṭan dawnah AIFF-in an dinna ti­chiangin I League champion-in AFC Champions League an khelh tur thu leh ISL champion-in AFC Cup an khelh tur an tichiang.

ISL leh I League khelh a ni a, Super Cup boruak pawh a dai. Season laihawl thlenga thuchiang a awm loh hnuin season tawp hnaih lamah AIFF-in Super Cup khelh tur an tichiang a, home & away a khelh tura beisei chu Bhubaneswar khawpuiah tournament 'pakhat' ang lekin nghah a ni.

Awmze nei lo?
AIFF-in thu an tichiang har a, chutihrualin 'Super' tih hming meuh phuah siin inelna champion tan Asia khawmualpui inelnaah beisei tur a awm chuang lo a, hei tak hi club tam tak chuan insen thlawnna turah an ngai a, khelh loh an duh hial.

Chennaiyin FC captain Hen­rique Sereno-a'n South Indian club tan contract la nei mah se Super Cup khelh a duh loh avangin Portugal lamah a haw fel diam tawh a, "Ka tan chuan hlutna nei lo tournament a nii," tiin Super Cup hi a sawisel a, AIFF chuan an duh a nih chuan league awm laiin cup com­petition an siam turah a ngai.

Player langsar zingah Kera­la Blasters striker Dimitar Ber­batov chuan Super Cup a khel dawn lo tih tichiangin league zawh rual khan India a chhuahsan nghal a, ISL-a kan hmuh foreign player zingah Su­per Cup khel lo tur an awm nual.

A chhan pakhat
AIFF-in in sawi mamna tur an zawng a nih chuan ISL club-te hian league-a ram pawn player an hman ang zat Super Cup-ah hman phalsak an ni lo. ISL-ah ram pawn player pariat neih theih a nih laiin Super Cup-ah paruk chiah neih phal a ni.

Mahse, tuna squad tihchian chinah ISL club pariat inlan tur zinga club pangain ram pawn player hman theih zat paruk aia tlem squad-ah an dah sa hrim hrim a, heng club panga zinga pathum Bengaluru FC, Chennaiyin leh Pune City te hi ISL-a top four zinga mi a ni.

Chumi aṭanga teh chuan ISL-a beisei ang result nei lo club ten rilru na tihdam nan Super Cup hi hman an tum ni berin a lang a, ISL club ten Super Cup an ngaihlu tawk lo. ISL-a ram pawn player tam zawk hi South American an ni a, ISL season zawh rual khan an ram lamah club an la nei leh thei - hei vang hian player tam zawkin Super Cup khelh aiin an rama haw an thlan vang a ni tel bawk.

Selna chu
Super Cup khelh tur tih­chian a nih ruala duh lohna thu tlangaupui hmasa bertu chu I League champion Minerva Punjab neitu Ranjit Bajaj a ni. Chanchin ngah ve tak Punjab pa hausa hian knockout round hmanga Super Cup khelh tur a duh lo a, a lo thlawna sum insennaah a ngai.

Mahse, Vanglaini thudawn danin I League CEO Sunando Dhar-a'n Ranjit hi lenchilhin indawrna a neihpui a, Minerva hian Super Cup an khel dawn. Mahse, Ranjit chauh hi league-a inrawlh langsar zinga Super Cup sawisel a ni lo.

Jamshedpur FC coach Steve Coppell chuan, "Super Cup a nihna ka hre lo. Coach leh player ka titi pui tawh zingah Super Cup nghakhlel ka la hre lo," a ti a, Pune City coach Ranko Popovic chuan league zawh hnu kar hniha Super Cup khelh ṭulna a hriat loh thu a sawi tawh a, Chennaiyin coach John Gregory chuan, "Super-ah kan ngai lo," a ti hmiah bawk!