Team ṭha Hunthar leh TNT inlan hun

Pro Volleyball League cham­pion lai Hunthar Vengin an nomawi humhim ngei tumin hma an la a, zanin dar 8:00 hian R. Dengṭhuama Indoor Stadium-ah an match hnihna atan TNT, Muanna Veng an hmachhawn dawn.

Hunthar leh TNT te hian an match hmasa berah hnehna an chang ve ve a, zanina a chak zawk tan semifinal kawng a awlsam chho tawh dawn. Inkhel pawimawh leh hmuhnawm tura ngaih a nih avangin zan dang ai mahin entu an ṭhahnem tura ngaih a ni.

Season hmasa lama player lang­sar Santhosh Kodakkal leh Sarang S Lal te awm tawh lo mah se Hunthar hian Punjab tlangval Ranveer an nei thar a, tualchhung player ṭha Lalrengsanga, Lal­duh­sanga leh Samson VL Chhan­chhuaha te an la neih bawk avangin rinkai an la ni tho.

Nikum May 27 khan Hunthar hi Chhinga Veng lakah set la miah loin an tlawm, PVL-a an match hmasa berah chak lo chiang viau mah se an insiamṭha chiang tawh hle, tun dinhmunah season hmasa nen chhiar zawmin match ruk chhung hnehna an chang tawh - TNT lakah a vawi sarih nan chak an tum ang.

Hunthar tan an khingpui tur TNT hi ngaihthah theih an ni dawn lo. Muanna Veng team hian an match hmasa berah PVL season 1 champion Anastasia chu 3-0 in an sawp thei. Mizo hlanga khel mah nise an inbuatsaihna a ṭha a, an thawhhona a ṭhat em avangin eng team mah an hlau bik lo.

Tualchhung volleyball inelna huanga tawnhriat nei ṭha berte zinga mi TNT hian season hmasa ber final-a an ngam loh lakah hnehna an chan let theih avang hian, nomawi kawl mektu Hunthar pawh an hlauh a rinawm loh. Anastasia an hneh ṭuma point 16 hlawh chhuaktu Lalramnunfela leh Vanlalchhantluanga Sailo te an pawimawh zual ang