Mizoram khingpui tur Kerala

Santosh Trophy vawi 72-naah Mizoramin semifinal an thleng a; match hnuhnung bera Karnataka an hneh loh avangin semi final-ah inelna thlengtu West Bengal an pumpelh.

Naktuk tlai dar 2:30 hian Mizoramin group A hmahruaitu Kerala an hmachhawn ang a; semifinal pakhat zawkah Karnataka leh West Bengal te Howrah Stadium-ah an inkhel ve bawk ang.

Semifinal chinah chuan hun pangngaia an inhnehtawk a nih chuan extra time khelh tur a ni a, an la inhnehtawk zel a nih chuan penalty shootout neih tur a ni. Santosh Trophy final hi April 1, Pathiannia khelh tur a ni.

Lawm tur?
Mizoram manager Hming-sanga chuan, "Group hmahruaitu nih leh nih loh hi lawm tur nge lawm loh tur hriatthiam a har. Mimal tak chuan inelna thlengtu West Bengal hi ka khelhpui châk lo zawk," tiin Karnataka hneh lo mah se West Bengal pumpelh vangin a lawm tho.

West Bengal hi champion ngun ber an nih bakah Kolkata-a Santosh Trophy nghah a nihin an la champion ziah a ni.

Chutih rualin result-ah erawh a lawm lo a, Hmingsanga chuan, "Chak kan duh a, chumi tur pawh chuan kan ṭang a, kan chak zo lo erawh pawi kan ti. Referee thutlukna hriatthiam a har a, inkhel a thunun tawk lo ṭhin," tiin match official a duh khawp loh thu a sawi lang.

Kerala nen chuan 
Mizoram Santosh Trophy an champion ṭum khan group stage-ah Kerala hi 3-1 in an sawp tawh a, hemi ṭum hian Zico Zoremsanga bakah tun ṭuma la tel F. Lalrinpuia leh Lalbiakhlua ten goal khat ve ve an khung.

Kum 2015 pawh khan group stage-ah awm ho lehin Valpuia goal hmangin 1-0 in Kerala hi group stage-ah an hneh a, semifinal-ah erawh team pahnih hi an tla ve ve.

Amaherawhchu an intawn hnuhnun ber chu nikum kha niin Kerala hi 4-1 in an chak. He mi ṭum pawh hian team pahnih hian semifinal an lut ve ve a, final an thleng zo lo ve ve a ni.

Mizoram champion hnuhnun ber chu kum 2014 kha a ni a, Kerala erawh hemi hma kumah hian final lut mah se nomawi an chawi hnuhnun ber chu kum 2005 daih tawh kha a ni.

West Bengal lam
West Bengal coach Ranjan Chowdhury chuan Mizoram an hmachhawn ngei turah ngaiin nimin khan Mohun Bagan ground a pan a, Mizoramin player pakua zet an thlak avangin kal thlawnah inngai mah se Karnataka zawk an hmachhawn dawn tak siah chuan a kal thlawn ta lo.

Karnataka hian Mysore hming an put laiin Santosh Trophy-ah vawi li an champion a, Karnataka hming an put hnuah kum 1976 khan final an lut a, hemi ṭuma an hneh loh chu West Bengal hi an ni.