Parker hlauhna nei lo Joshua

Anthony Joshua chuan March 31-a a hmachhawn tur Joseph Parker lakah hlauhna rilru a put miah loh thu a sawi a, Parker hmachhawn a remtih chhan chu New Zealander boxer-in hmasawn a duhna thinlung chu a zah sak vang a nih thu a sawi.

WBA leh IBF world heavyweight champion Joshua leh WBO champion Parker-te hi Cardiff khawpuia Principality Stadium-ah an inhnek dawn a, he inhneka chak zawk hian kawnghren pathum hi an kawl vek thei dawn a ni.

Kum 26 mi Parker hian a kiuah hliam a tuar a, December khan zai a ni. Mahse, Joshua hi hmachhawn ngei a duh avangin theihtawp a chhuah chhunzawm a, hei tak hi British boxer Joshua chuan a ngaih pawimawh thu a sawi.

Vawi 20 inhnek a hmachhawna a khingpuite knockout vektu boxer chuan, "Parker-a tih tak takna hian min hneh a, hei vanga amah hmachhawn duh pawh ka ni. Hmasawn a duh tih ka hria a, keipawhin hmasawn ka duh a ni," a ti.

Joshua hian April khan boxing legend Wladimir Klitschko chu Wembley-ah mipui 90,000 hmaah a hneh a, kum 28 mi boxer chuan, "Klitschko nena kan inhnek kha ka thlir kir a, thil thleng tur a thleng vek," tiin Parker nena an inhnek tur aia a dah san thu a sawi.