Kyrgios aia huai zawk Zverev

Alexander Zverev chuan Nick Kyrgios hnehin Miami Open quarterfinal a lut a, champion tura rinkai Juan Martin del Potro pawhin harsa lo takin hnehna a chang bawk.

Thawhlehni zan inkhelah German tlangval Zverev hian 6-4, 6-4 in hnehna a chang. World number 5 Zverev-a'n semifinal lut tur chuan zaninah Denis Shapovalov hnehtu Borna Coric a paltlang leh a ngai dawn a ni.

World number 6 Del Potro-a'n a khelh ṭhat chhawm nung zelin Filip Krajinovic chu 6-4, 6-2 in a hneh. Argentina tlangval hi set hmasa zawkah 1-4 in hnufual mah se game hnuhnung panga a la vek a, set hnuhnung zawkah harsatna a tawk tawh lo.

A zawna match 14 chhung chak tawh Del Potro hian Milos Raonic a hmachhawn leh dawn. Seeded 20-na Raonic hian Jeremy Chardy chu 6-3, 6-4 in a lo hneh ve bawk a, Canadian tlangval hi a hliam a dam hnuah a rawn tho chhuak mek, a ball vuak na leh service ṭha a neih let leh tawh avangin player hlauhawm a ni leh tawh.

Last 16 inkhel dangah 2014 US Open champion Marin Cilic chu John Isner hmaah 7-6 (7-0), 6-3 in a tlawm. Roger Federer a tlak hnuah seeded pahnihna Cilic hi player beisei awm leh ranking sang ber a ni a, ani a tlak leh takah chuan player naupang leh langsar lo zawkte tan nomawi chawi theihna hun a inhawng ang.