France tan Pogba a mawi

Jose Mourinho hnuaia khelhna hmun chang tam tawk lo Paul Pogba chuan amah ringtu Didier Deschamps hnuaiah a thiamna a pholang.

St Petersburg-ah France kawr hain Manchester United midfielder Pogba hian yard 30 aṭangin minute 40-naah freekick a pet lut a, minute 40-naah Kylian Mbappe goal khung tur a siam sak bawk. French rawlthar duhawm Mbappe hian minute 83-naah Les Bleus goal thumna a khung a, 3-1 in hnehna an chang.

FIFA World Cup thleng tur Russia hian minute 68-naah Fedor Smolov hmangin goal khat an khung ve a, France an hneh loh hma hian Brazil lakah 3-0 in an tlawm bawk a ni.

International break a zo ta a, kartawpah club inelna a awm chhunzawm leh tawh ang. Pogba hi United-in FA Cup-a Brighton & Hove Albion an hneh ṭumin bench-ah a ṭhu tluan a, Inrinni zanah Jose Mourinho hoten Swansea City an mikhual dawn. French midfielder-in hmun a chang ang em tih chu Portuguese manager thutluknaah a innghat ang.