Brazil-in Germany lakah phuba la

Germany-in kum li liam ta khan Belo Horizonte-ah Brazil chu 7-1 zetin an sawp a, 2014 World Cup semifinal-a thil thleng hian Brazil a ṭhawng na hle. Selecao hian Thawhlehni zan khan Berlin khawpui luhchhuahin Gabriel Jesus-a goal hmangin Germany lakah 1-0 in phuba an la.

Brazil forward Jesus hian minute 37-naah Willian-a vawrhluh chu inkhela goal awmchhun ni turin a tauh lut a, Germany third keeper Kevin Trapp-a'n a hna a tlin tawk lo. Manchester City forward hian goal dang khung theihna tur hun ṭha a hlah a, second half-ah Trapp-a'n corner aṭanga ball kal chhut saul mah se goal dang khung belh tawh lo.

Joachim Low hoten an siphurh an sut thei lo a, Euro 2016 semifinal-a France an hneh loh hnuah chak lo nei loin match 22 kaltluang mah se Selecao hmaah an record duhawm hi tihtawpin a awm. Die Mannschaft hian hemi chhung hian an khingpui vawi 16 an hneh a, vawi ruk dang an inhnehtawk bawk.

Brazil tan erawh chanchin lawmawm a ni a, 2016 Olympic Games football final-ah Germany lakah phuba la mah se tun hi kum 2014 hnua senior international match an khelh lehna hmasa ber a ni.

Inkhelh hmain Brazil coach Tite chuan, "7-1 kha chu mangchhia a ni a, tun thlengin an la sawi. Kan sawi nasat ang zelin a rawn thar chhuak leh ṭhin a, kan hliam hi la na reng a, Berlin-a kan inkhel tur hi a thawi damna pakhat a ni," tiin a sawi a, Germany aiin friendly match-ah pawh hian chak châkna an ngah zawk.

Tite hian a thusawi bawhzuiin player pawh a neih ṭha ber ber a thlang a, Neymar erawh hliam vangin a thlang thei lo. Inkhelh banah Brazil defender Thiago Silva chuan, "Kan zahawmna humhim nan kan khelh a ṭul a ni. Kan jersey hian zah a phu a, chuvangin tun ṭuma kan chak pawh hi ka lawm lehzual a ni," tiin a sawi. PSG captain Thiago Silva hi hrem vangin semifinal-a Germany an hneh loh ṭum hian a khel lo.

Germany boss Joachim Low chuan, "Brazil kha an thinlung hliam nen an theihna zawng zawng an chhuah kha rin dan sa a ni a, an ṭhat dan berin tha tho takin min hmachhawn a ni. Kan khelh ṭhat ni a ni lo a, tihsual kan ngah a, kha khan Brazil kha inrintawkna a pe a ni. Player naupang zawk ten inzirna tur an nei a, player ṭhenkhat rilru put hmang a dik lo bawk," tiin inkhel chungchang a sawi ve bawk.