Jeje-a goal-in India chhan thei lo
Kyrgyzstan khawvawt hnuai inkhelah India tan Jeje Lalpekhlua'n goal khung mah se Blue Tigers tan Mizo tlangval goal khung a tawk zo lo a, an mikhualna ramah 2-1 in an tlawm.
AFC Asian Cup 2019-ah team pahnih tling tawh mah se qualifier match hnuhnung bera hnehna chan hi India tan draw neih a nih huna khingpui awlsam zawk neih phah theihna inkhel a ni a, an hun ṭha neih erawh an chhawr thei lo.
India tan match 13 chhung ngamtu tawng loa an kaltluan chu a tawp ta a, nakkum Dubai-a Asian Cup khelh turah Blue Tigers hian thlen san an duh a nih chuan hmasawnna tur tam tak an la nei tih an khelh dan aṭangin hmuh tur a awm.
Ruatthara telna
India coach Stephen Constantine-a'n a vawi khat nan Lalruatthara chu India tan inkhel bul a ṭantir a, Hmunhmelṭha tlangval-in tawnhriat a la ngah tawk lohna erawh minute thumnaah hmuh turin a awm nghal.
Mualneitu team tan India a hmachhawn hmaa qualifier-a goal kua ngawt khung tawh Anton Zemlianukhin a inlar a, goal hmahruai a khung–Kyrgyzstan striker goal khung chhanah Ruatthara'n mawh a phur tel a, chutihrualin Aizawl FC defender hlui hian second half erawh a khel chhe lo.
India coach Stephen Constantine chuan, "Ruatthara hi player ṭha tak, hmabak nei êng tak a nih avangin inkhel bul ka ṭantir a ni, " a ti a, Asian Cup khel tura an tlin chian tawh tho avangin Kyrgyzstan nena an inkhel chu Dubai-a khelh tur inelna atana inbuatsaih nan an hman thu a sawi tel bawk.
Jeje leh goal
Indian Super League-a Chennaiyin FC tana goal kua khungtu Jeje-a'n India tan pawh goal a la khung thei reng a, hun tawp nan minute hnih chiah a awm tawh tihin goal a khung–Hnahthial tlangval goal hi Halicharan Narzary siamsak a ni.
Mizo Sniper tia hminglem an pek striker-in India tana a match hnuhnung pathumah match tinah goal khat ṭheuh a khung a, Kyrgyzstan laka goal a khung chiah khan Asian Cup qualifier match sarih aṭanga goal ruk a khungna chiah a ni bawk.
Jeje hian minute 88-naa a tauh luh bakah hian goal khungna dang pawh a nei a, mah se Mizo striker-in ball chang se chuan amah chauhin a tlanluh pui thei dawn nia a lan laiin Kyrgyzstan captain Azamat Baimatov chuan a ben thlak sak a, red card hmuh ngeina tur nia langah Baimatov hi yellow card chauh pek a ni.
Constantine-a duhthlanna
India coach Stephen Constantine-a'n, "He hmunah hian hnehna chang turin kan lokal a ni," tiin sawi mah se a squad thlan dan aṭanga teh erawh chuan India coach hi a ṭawng vai em ni chu aw, tih mai tur a ni zawk.
English coach hian league lama beisei phak lo tak pahnih Rowllin Borges leh Mohammed Rafique te chu midfield-ah a inkawptir a, player pahnih hi Indian midfield-in Kyrgyzstan midfield an ngam loh chhanah puh theih an ni–ISL leh I League-a an season duhawm lo an chhawm nung zel niin a lang.
India squad-ah hian rin loh takin Seiminlen Doungel a awm bawk a, season hman zawh taka NorthEast United tana goal li khungtu striker hian goal khungna chance nia langah hmasial lo takin a pek theih reng 'Jeje' kha pe se chuan a hmingṭhatpui zawk ngei ang–holam takin a hun neih a khawhral.
Chhetri tel lohna
India-in hrem vangin Sunil Chhetri an chhawr thei lo a, hliam vanga koh loh Eugeneson Lyngdoh tel loh midfield-ah a lang viau bawk. India coach Constantine-a'n 4-2-3-1 formation hmangin squad rem mah se Indian player ten goal khung tura dah Jeje an hmu fuh thei lo.
Blue Tigers-in Chhetri an mamawhna a la sang reng tih a lang a, a hmun ruaka khel Balwant Singh-ten captain hnung an zui zo rih lo hle. Udanta Singh-a'n a tharum leh tlan chak chhawr tum viau ṭhin mah se Kyrgyzstan defender palian karah Manipur winger a thamral leh ṭhin a, Narzary lah chhuan tur a nei bik lo.
Mizo zingah Jeje leh Ruatthara ten inkhel bul an ṭan a, substitute bench aṭangin Jerry Lalrinzuala luhtir a ni bawk–tun hnaia Mizo player-te chet ṭhatna thlir chuan nakkum Asian Cup-ah Mizo kan hmu nual a nih pawhin a mak lo ang.
Jeje-a lawm
India tana goal khungtu Jeje-a chuan, "Chak lo mah ila lawmna tur a awm thoin ka hria. Hmahruaitu nichungin Asian Cup khel turin kan tling a, hun tawp hamrik a rik khan Mizo pathum khelmual chhungah kan awm bawk," tiiin Vanglaini a hrilh.
Asian Cup-ah hian head to head en a ni a, India-in Kyrgyzstan hi an mualah 1-0 in an hneh a, tun ṭumah hian chak lo mah se khualmuala Jeje-a goal hmangin group hmahruaitu an ni.
Team chungchang sawiin Jeje chuan, "Asian Cup meuh khel tur chuan nasa taka inpuahchah a la ṭul dawn. Tun ṭumah khan midfield-ah kan ngam lo deuh a, position hrang hrangah pawh hmasawnna tur a tam hle," tiin a sawi.