Ball tampering vangin Australia cricket a mualpho
Australia-in test match khelh turin South Africa-ah an cham mek a, test match vawi thumnaah Aussies captain Steve Smith leh vice captain David Warner te hriatpuinaa bowler Cameron Bancroft-a'n ball awm dan a khawih danglam avangin an mualpho. Ball tampering-a inhnamhnawih player pathum hi an thawn haw a, an series khelh hmabakah wicketkeeper Tim Paine a captain chhunzawm ang.
Thil thlenna hmun hi St George's Park Cricket Ground a ni a, hemi ṭum hian mualneitu South Africa hi wicket rukin an chak a, test match vawi li khelh turah 2-1 in hma an hruai mek. Test match hnuhnung ber hi naktuk tlai dar 1:30 aṭangin Wanderers Stadium, Johannesburg-ah khelh tur a ni.
Ruahmanna awmsa
Third test-ah hian camera-in Bancroft-a'n a kekawr aṭanga 'tape eng' a tih a phawrhchhuah lai chu a lang a, hemi zawh hian ball a khawih zui bawk. He thil thlen dan hi tv lamah pekchhuah a nih avangin Bancroft hi hrilh hriat a ni hman niin a lang. Umpire pahnih Nigel Llong leh Richard Illingworth te hmaa koh a nih hnuah puan dum bak a pholang lo a, ball pawh thlak ni lo mah se inkhelh zawhah erawh an thil tihsual hi thup theih a ni lo.
Australia captain Smith chuan, "Team hruaitu lam chuan inkhelh hmain kan sawi lawk a, kan ṭhatna turah ngaiin kan pawm tlang. Kan tisual takzet a, coach a inrawlh lo a, player thutlukna a ni," tiin thil thlen dan a hriatpui thu leh coach a inrawlh loh thu a sawi.
Ngaihdam dil zuiin Smith chuan, "Hei hi a thlen vawi khatna a ni a, a thleng nawn tawh lo ang. Australia cricket thuneitu CAM te tawrh dan tur ka hriatthiam pui a, kan ti mualpho hle a ni. Australian cricket team hi hetiang hi kan ni lo a, a hruaitu bikte thutlukna siam sual vang a ni," a ti.
Coach a tel lo!
Team chhunga thuneihna sang tak neitu coach Darren Lehmann-a'n thil thleng a hriatpui lo a, hei vang hian hrem zingah a tel lo. Amaherawhchu cricket chhungkua chuan hei hi an pawm vek lo a, cricketer lar Kevin Pietersen, Mohammad Kaif leh mi ṭhahnem takin an pawm loh thu social media kaltlangin an puangzar ve bawk.
Player hrem pathum dang thlak nan Cricket Australia chuan Glenn Maxwel, Joe Burns leh Matt Renshaw te chu an ko thung.
A pawi zo tawh
England captain hlui Michael Vaughan chuan, "Steve Smith leh a team te bakah team enkawltu zawng zawng te hi an career-ah eng ang pawhin hlawhtling se bum hmang tihin an hre reng tawh ang," tiin na takin a sel nghal a, Australia a hmuh dan a dang nghal hle bawk. Vaughan chuan, "Australia hian England lakah Ashes-ah 4-0 a series an lak ṭum pawh khan hetiang thil hi chu a thleng tawh a, result a danglam phah chu ka ring lo a, mah se a thlen ngei hi ka ring a ni," tiin a sawi.
Cricket lama thuneitu sang ICC lam chuan Ashes lam chuan darkar 48 chhunga complaint thehluh a nih loh avangin an chhui zui loh tur thu an tichiang nghal thung. England coach Trevor Bayliss chuan, "Pawi ka ti a, Australian ka nihna angin ka zak a ni. Steve hi pa ngainatawm tak ni mah se thil pawi tak a khawih a ni," tiin a sawi a, Australian coach hian New South Wales-ah Smith hi a lo enkawl tawh a ni.
ICC lam chuan dan angin 'ball tampering' a inhnamhnawih te hi hremna a nei a, test match vawi khat leh an match fee chawitir bak a nih loh avangin hremna na tak a ni hran lo. Amaherawhchu Australia thuneitu lamin hremna hi an la belhchhah thei a, anni hi chuan damchhunga ram aiawha khel thei tawh lo tur thleng pawhin an hrem thei thung.
Cricket Australia (CA) CEO James Sutherland chuan, "An chet dan hian team leh Cricket Australia inpumkhatna a tichhia a. Cricket hmangaihtute lungawi lohna kan hria a, in thinrimna hi kan ṭawmpui che u a ni. Hemi chungchangah hian chhanna kan zawng a, kan thil hmuh chhuah te kan rawn la hriattir ang che u," tiin an lungawi loh thu a sawi ve bawk.
Australia media lam chuan Smith leh Warner te chu CA-in kum khat chhung ram aiawh thei lo turin a hrem niin an tarlang tawh a, amaherawhchu he thuziah lai hian thuchiang a la awm lo.