UEFA-in dan thar a nei
Europe-a football thuneitu sang ber UEFA chuan season thar aṭanga hman ṭan turin dan thar a duang a, a langsar ber chu player pakhatin club pahnih tan European competition an khel thei tawh tur hi a ni.
Tun dinhmunah chuan thlasik transfer-a player lakluh ten an club hlui tan Champions League emaw Eruopa League an khelh hman chuan an club thar tan hian Europe-ah an inlan thei lo ṭhin a, season thar aṭang chuan a danglam tawh dawn.
Hei mai hi a ni lo. Knockout round chinah chuan substitution pali siam theih a ni tawh dawn a, hei erawh extra time atan chauh hman phal a ni thung. Champions League group stage inkhelh hun dar zat pawh tih danglam a ni a, keini ramah chuan Champions League group stage match en turin zanlai nghah thlen a ngai tawh dawn lo.
Player pathum
Group stage khelh zawhah club-in an duh chuan an la chhawr loh player pathum an chhawr thei tawh dawn a, buaina tur a awm tawh lo.
Barcelona-in January-ah manto takin Philippe Coutinho lalut mah se Brazilian forward hian Liverpool tan group stage-ah a hmel a lan tawh avangin Catalan club tan Champions League-ah a hmel a lan thei lo - season tharah erawh player tharin a club hlui tan CL lo khel tawh mah se a khelh chhunzawm thei tawh dawn tihna a ni.
Arsenal-in Pierre-Emerick Aubameyang chu Champions League-a Borussia Dortmund tana inlan ni mah se Europa League-ah an tlak thlak avangin Europa-ah hian an chhawr thei lo a, Henrikh Mkhitaryan erawh Champions League khel a nih avangin an chhawr thei thung - heng buaina zawng zawng hi season tharah chuan a awm tawh lo ang.
Inkhelh hun
Tun dinhmunah chuan Champions League match hi Britain sanaa zan dar 7:45, India sanaa zanlai dar 12:15-ah khelh ṭhin a, inkhelh hun hi tih danglam a nih dawn avangin zanlai nghah thlen a ngai tawh lo ang.
Group stage match bik hi Thawhlehni leh Nilaini zanah khelh ṭhin tur a ni ang a, zan dar 10:25-ah inkhel en theih a ni tawh dawn. Knockout round match en tur erawhin men rei a ngai dawn tho a, zanlai dar 12:30-ah an khel ṭan ṭhin dawn.
Europa League bikah chuan group stage match aṭanga last 16 thlengin zan dar 10:25 leh zanlai dar 12:30-ah an inkhel ṭan ṭhin ang a, quarterfinal, semifinal leh final chu zanlai dar 12:30-ah vek an khel ṭan ang.
Substitute chu
Knockout round chinah substitution pali a siam theih tawh dawn a, he dan hi FA Cup leh League Cup lamah hman a lo ni tawh. Tuna dan hman mek ang chuan substitute pathum chauh a hman theih a, hei hi extra time bikah pakhatin a belh dawn tihna a ni.
Season hman mekah chuan Champions League, Europa League leh UEFA Super Cup-ah club-in match khelh dawnin squad-ah player 18 chiah an nei thei ṭhin a, hei hi 23-ah tihsan a ni. Chumi awmzia chu club ten substitute bench-ah player 12 an nei thei tawh dawn tihna a ni.
UEFA chuan, "He thlak danglamna hian club bakah a bik takin coach-te tan duhthlan tur tam tak a chhawp sak dawn a, season tluana an match pawimawh ber pawla duh thlan tur an neih hi kan duhsak a ni," tiin an thutlukna chungchang an sawifiah.