Durtlang North an chak nawn
Tualchhung volleyball inelna sang ber RS Traders Pro Volleyball League-ah Durtlang North chu vawi hnih chak thei hmasa ber an ni. Kai thar team pahnih inkhelah Durtlang team hian an khingpui ITI Veng chu straight set-in an hneh.
Thawhlehni zan R. Dengṭhuama Indoor Stadium-a inkhelah Durtlang North hian ITI Veng lakah 25-16, 25-21, 25-18 (3-0) in hnehna an chang a, semifinal lut thei turin an dinhmun an sawhnghet chho zel.
Tuichangral an hneh hnuah Durtlang North an khel ṭha chhunzawm, ITI Veng lakah Nakul Dev-a'n point 19 thawk chhuakin vawi 12 a tisual a, LG D3 Player of the Night-a thlan a ni. Dev hian match hnih a khelh tawhah point 54 hmuin, point 31 a hloh tawh. Lalbiakmuana'n vawi 12 vaw tlain ṭum sarih a hloh ve thung.
Mizo hlanga khel ITI-in ṭantu nei ṭha viau mah se inelna sang PVL-ah ball vaw tla thei an awm mumal lo, an defending ṭha angreng viau mah se an khingpui an nawr nat tawk miau loh avangin a tlawm zawkah an ṭang.
April 3-ah Durtlang North hian season hmasa ber champion Anastasia, Electric Veng an tum dawn. ITI hmabak a hautak zel a, April 4 zanah team ṭha TNT, Muanna Veng nen an intawng zui ve leh dawn a ni.
Anasatasia vs Tuichangral
Zanin dar 8:00 hian a hmun ngaiah, an match hmasa zawka chak zo lo pahnih Anastasia, Electric Veng leh Tuichangral an inkhel dawn. An intawn vawi khatna tur a nih bakah, point mamawh inkhel tur an nih avangin a hmuhnawm ang.
PVL champion hmasa ber Anastasia hi season hmasa khan an inlan lo, kuminah rawn kir lehin beisei ang chuan an khel nghal bik lo - an match hmasa berah set la loin TNT lakah an tlawm.
Aizawl khaw pawn aṭanga PVL khel hmasa ber Tuichangral hian hnehna chang tur chuan an fimkhur a ngai dawn a, tihsual neih tlem a pawimawh ang. Anastasia lakah hnehna an chang a nih chuan semifinal beiseina an nei dawn a, an chak lo nawn a nih erawh chuan kawng a harsa tawh ang.