Set hloh mah se Medvedev a chak

Daniil Medvedev chuan US Open 2021 khelh laiah a vawi khat nen set a hloh ve a, mahse world number 2 tan hian semifinal luh dal tur khawpa harsatna a la awm lo - Botic van de Zandschulp hnehin quarterfinal a paltlang.

Thawhlehni zan inkhelah Medvedev hian qualifier paltlanga inlan Zandschulp hi 6-3, 6-0, 4-6, 7-5 in a hneh a, tun hnai season thum chhung chu a zawnin US Open semifinal a in vaw kai ta.

Inkhel dangah Felix Auger-Aliassime chuan Carlos Alcaraz chu 6-3, 3-1 (ret.) in a hneh. Alcaraz hi hliam vangin a khel zui thei lo, semifinal-ah chuan Medvedev leh Auger-Aliassime an inhmachhawn zui leh ang.

Dan theih loh
Clay, grass leh hard court-a tennis ball kal dan a inang lo a, player tan insiamrem a ngai nasa thei hle. Chutih rualin professional player ten inkhelh thiamna hmun an nei zel, hard court hi Medvedev tan inkhelh nawmna hmun a ni.

A match hmasa paliah Medvedev-a'n set a hloh miah lo, quarterfinal-ah erawh set thumna a hloh ve tlat. Amaherawhchu, Dutch tlangval aia a thiam zawk miau avangin a buai zui lo, darkar hnih leh minute 23 chhungin hnehna a chang.

Kum 25 mi Medvedev chuan, "2019 khan Grand Slam ka khelh fuh ber ṭum a ni a, he hmunah hian final ka lo lut tawh a nih kha. New York khawpui hi ka tan chuan hmun nuam leh hlu bik a ni a, kuminah hian a hmawr bawk thei ngei ila tih hi duhthusam a ni," a ti.

Chak lo Van de Zandschulp hi world number 117 daih a ni a, tun ṭum hi a tawn san ber a ni. Qualifying aṭanga inlan ṭan a nih avangin match a khel hnem, quarterfinal thleng tur hian darkar 22 zet court chhungah hun a hmang, inkhel boruak sangah a chau tih a lang.

Medvedev chuan, "Van de Zandschulp hi tun hmain hriat a la hlawh tawk lo a ni mai thei, tunah chuan miin an hrechiang tawh ang. Tun ang zela a khel thei a nih chuan world ranking-ah pawh a thleng sang thei a, a sang zual 30 zingah a tel phak hial ka ring," tiin a sawi.

Hmabak Auger-Aliassime
Quarterfinal inkhel dangah tawnhriat nei tam lo pahnih an intawng. Felix Auger-Aliassime chuan Spanish rawlthar Carlos Alcaraz lakah hnehna a chang a, tennis inelna lian ber Grand Slam huangah a vawi khat nan semifinal a lut - a hmachhawn leh tur chu Medvedev a ni.

Canadian tlangval, kum 21 mi Auger Aliassime chuan, "Medvedev hi hard court-ah chuan khawvela a ṭha berte zinga mi a ni a, tawnhriat a neih ṭha hle bawk. Ani hneh tur chuan tun hma zawng zawng aia ṭha zawkin ka khelh a ngai dawn," tiin semifinal a thlir lawk.

A hneh tak Alcaraz chung-chang sawi zuiin Aliassime chuan, "A vanduaina kha ka tawrhpui, inelna lianah thui tak a thlen hnuin hliam vangin a khel tluan thei ta lo a ni a, a uiawm dan tur chu ka hriatthiampui," tiin a sawi.

Chak lo kum 18 mi Alcaraz hi US Open khelh tawh chinah chuan, tun hnai kum 31 chhungin mipa player zinga quarterfinal lut thei naupang ber a ni, a lakah beiseina pawh a sang hman. Match tir lamah natna nei angin lang lo mah se set hnihna laihawlah a malpui hliam vangin a khel zui thei lo.

Seeded pathumna Stefanos Tsitsipas pawh hneh tawhtu Alcaraz hian a malpui hliam chu inkhelh hmaa mi a nih thu a sawi a, a theihtawpin khel lui mah se a taksain a tlin ngang loh vanga inhnukdawk ta a nih thu a sawi bawk.