France chakna Griezmann-a goal hnih

Barcelona-a chhuah-san hnuah Antoine Griezmann-a'n Calatan club ṭantute chil tiput turin a chet ṭhat a chhunzawm zel a, Finland laka 2-0 a an chakna inkhelah goal hnih a khung.

Tun international break-ah France-in beisei ang result an nei thei lo - Bosnia-Herzegovina (1-1) leh Ukraine (1-1) lakah si phurh suttu zawkah an ṭang ve ve a, point an hlawh chhuak hram.

Mikhual Finland lakah erawh France thawnthu her danglamin a awm a, Griezmann-a'n minute 25-na lekah goal hmahruai a khung - minute 53-naah French striker hian a chhunzawm leh bawk a, 2-0 in a chak.

Barcelona aṭanga Atletico Madrid-a loan-a kir Griezmann hian a club thar tan a la khel lo a, mahse, international break-ah ram tan match thum khelin goal thum a khung - Atletico boss Diego Simeone-a'n hlim takin a inkhel a en ngei ang.

France-in hnehna an chan avangin group D-ah point 12-in hma an hruai mek a, an hnuai chiaha awm Ukraine (5 pts) aiin point sarih zetin sang mah se match hnih chiah khelh tur an neih laiin Ukraine hian match thum khelh tur an la nei a, an hneh tak Finland (5 pts) phei chuan match li khelh tur an la nei.

Finland hian France khelh ang zat khela an chak ve ve chuan Les Bleus point hmuh ang zat an hmu dawn tihna a ni a, France an la him bik lo.