Keita-a'n Guinea a chhuahsan

Liverpool midfielder Naby Keita chu an ram Guinea buaina avangin a hma hun chiang lo mah se tunah chuan hruaichhuah a ni tawh a, Guinea-ah a awm tawh lo.

Kum 26 mi midfielder hi Guinea tana World Cup qualifier khel turin an ramah a kal a, mahse, sipaiin sorkar lai rorelna paihthlak an tum avangin buaina nasa tak a thleng a, Thawhṭannia Morocco nena an inkhel tur chu an ram buaina avang hian a khelh hun tur sawn a ni.

President Alpha Condé kaihhruai Guinea sorkar chu Col. Mamady Doumbouya-a kaihhruai sipaite chuan rorelna aṭangin an paih thla fel tawh niin a lang a, helna chhuah chhan hi ram chhunga eirukna leh mipui chunga hleilenna nasa lutuk vang a nih thu sipai lam chuan an sawi.

Hetiang boruak karah hian Guinea ramri zawng zawng pawh khar a ni a, Guinea player-te chauh ni loin Morocco squad pawh an buai hman hle - anni erawh Keita dinhmun hriat a nih hma khan an ramah hruai haw an ni tawh.

Keita leh ram tana a khelhpui ṭhenkhatte chuan Thawhlehni khan thlawhtheihna hmangin him takin an ram hi an chhuahsan a ni. Guinea sipai sorkar chuan an ramrite hi an hawng leh tawh niin an sawi.