Premier League-ah Brazil player 8 inlan dawn lo
Brazil football thuneitute chuan ram tana khel duh loh chungchanga FIFA dan lekkawh an remti a, tunkar tawp Premier League inkhelah Brazilian player pariat an inlan thei dawn lo.
Liverpool, Manchester City, Chelsea, Manchester United leh Leeds United ten hremna hi an tuar dawn a, tunkar tawpah Brazilian player an chhawr thei lo ang.
Dan chu
FIFA danah chuan ram tana koh, player kal duh lo chu international break zawh ni nga chhung inkhel thei lo tura hrem theih an ni.
UK sorkarin player chungah Covid-19 dan a thlahdul duh lo a, red list rama zinte chu ni 10 chhung inkhung hran leh a ngai, hemi a nih avang hian Premier League club ten an player-te hi an chhuah duh lo.
Chutihrualin player chunga hremna lekkawh a nih hmain ram tana khel duh lo player-te hi FIFA hnena hriattir a ngai. Brazil pawh hian Everton chungchangah zahngaihna an lantir a, Olympic khel tura Richarlison an chhuah tho avangin hrem zingah telh a ni lo.
Tun ṭuma hremna hian September 10-14 chhung a awh dawn a, hemi hun chhung hian ram kohna chhang lo player-te hi an club tan an khel thei lo ang.
Hremte chu
Brazil-in Premier League aṭangin player pakua an ko. Chungte chu Liverpool player pathum Alisson, Fabinho leh Roberto Firmino, Manchester City aṭangin Ederson leh Gabriel Jesus, Chelsea defender Thiago Silva, Manchester United midfielder Fred, Leeds forward Raphinha leh Everton striker Richarlison te an ni.
A chunga tarlan ang hian Richarlison hi hriatthiam a ni a, player dang zawng hi tunkar tawpah an inlan thei dawn lo. Hei chauh a ni lo a, karleh hian Champions League ṭan a nih dawn avangin player ṭhenkhat chuan match hnih an khel thei dawn lo tihna a ni.
Chelsea defender Thiago Silva leh Manchester United midfielder Fred te chu Champions League match hmasa bera Zenit St Petersburg leh Young Boys an hmachhawn hunah an tel thei dawn lo.
Liverpool leh Manchester City erawh an vannei a, September 15 zanah Champions League match hmasa ber an khelh dawn avangin Europe inelnaah an player an chhawr thei dawn.
Premier League champion lai Man City hian Community Shield-a an hneh loh Leicester City an hmachhawn dawn a, Reds hian Leeds United an hmachhawn thung dawn. Chutihrualin Marcelo Bielsa pawhin Raphinha an chhawr thei bik lo ang.
Mexico, Paraguay leh Chile Football Federation te pawh FIFA hnenah an zualko tawh a, tunkar tawpah Raul Jimenez (Wolves), Miguel Almiron (Newcastle United) leh Francisco Sierralta (Watford) te an khel thei dawn lo.
Buaina chu
Premier League club-te hian FIFA hremna hrechungin thutlukna an siam a, ram tana khel turin an player-te kal an phal lo. Tun ṭumah pawh hian hremna hi tuar ngei mah se an player-te hi ram tana khel tura an kaltir hian an chhawr har zawk dawn.
FIFA hremna hi chu ni nga chauh a ni a, UK red list rama kalte hi chu ni 10 chhung inkhung tur an ni. Player-te hi an inkhung chhung hian traning mumal an neih theih dawn loh avangin an fitness a tlahniam dawn a, quarantine zawh hnuah pawh chhawr nghal mai theih an ni dawn lo.
Tun ṭumah pawh hian Aston Villa leh Tottenham te chuan player pahnih ve ve Argentina tana khel turin an kaltir. Chung player-te chu Emiliano Buendia, Emiliano Martinez, Cristian Romero leh Giovani lo Celso te an ni. Brazil leh Argentina inkhel tur chu minute nga hnu lekah an tihtawp tak si avangin match khat chu an khel ta chuang lo. Brazil sorkar danah UK aṭanga an rama lutte chu ni 14 quarantine an ngai a, Premier League player-te vang hian inkhelh an ṭhulh phah. Chutihrualin Villa leh Spurs player-te hi England-ah kir leh tawh mah se quarantine an ngaih avangin tunkar tawpah an inlan thei dawn lo.
A nihna takah chuan South America ramte hian match thum khelh tur an nei zawk a, match thumna hi tukin zingah an khel chauh. Premier League-a khel player-te hian South America rama qualifier match zawng zawng an khel a nih chuan Covid-19 inkhuahkhirhna hi awm ta lo reng pawh ni se tunkar tawpah an inlan hman lo hrim hrim.
A la buai dawn
Covid-19 in kiam lam a pan emaw sorkarin inkhuakhirhna dan a thlahdul emaw a nih ngawt loh chuan buaina hi a la awm leh dawn. International break hi October leh November thlaah a awm leh dawn a, World Cup khel tur zawnna match a nih dawn avangin club, player leh ram tan thutlukna siam a har lehzual ang.
Premier League club chauhin harsatna hi an tawk lo a, ram dang zawng pawhin an tuar vek. Tukin zing dar 5:00 hian Argentina leh Bolivia an inkhel a, dar 6:00-ah Brazil leh Peru an inkhel leh bawk. Hemi a nih avang hian PSG hian Inrinni zana Clermont Foot an mikhual hunah chuan an player langsar pahnih Lionel Messi leh Neymar bakah player ṭha dang an chhawr thei lo ang.