A changtupa pahnih - Depay & Haaland ten hattrick an siam

Memphis Depay-a'n international football-a a hattrick hmasa ber a siam a, Netherlands chu Turkey lakah 6-1 in hnehna a chanpui. Group G-ah hma an hruai chhunzawm zel.

Netherlands tan Davy Klaassen, Guus Til leh Donyell Malen ten goal khat ve ve an khung bawk a, Netherlands-in goal thum an khung hnuah Turkey defender Caglar Soyuncu hnawhchhuah a ni a, Turkey tan thawh ngaihna a awm tawh lo.

Depay-a hattrick siam zanah Erling Braut Haaland a awm mai mai bik lo. Norway striker hian World Cup khelh a châk tih pholangin hattrick a siam a, Gibraltar lakah an ram chu 5-1 in hnehna a chanpui.

Norway-in hnehna an chan avangin Netherlands nen match ruk an khelhah point 13 ve ve an nei tawh a, team pahnih inum boruak a ngaihnawm chho zel ang.

A goal hma
Netherlands-in team ṭha pangngai Turkey an mikhual a, goal khung turin minute khat bak an nghah a ngai lo - tun hnaia form tak Klaassen chuan minute khatna lekah goal hmahruai a khung a, Depay-a siamsak a ni.

Mahni mualah Oranje an pawr a, goal khatah an duhtawk lo - minute 16-naah Klaasen-a'n Depay-a duhsakna lantir ve lehin a siamsak a, Barcelona forward hian an goal hnihna a khung.

Minute 38-naah Depay-a'n penalty hmangin an goal thumna leh a goal hnihna a khung zui a, panenka hmanga a penalty pet hi Turkey keeper Ugurcan Cakir chuan a dang thei lo. Netherlands-in minute 40 pawh a tlin hmain goal thum an khung fel der a, chawlhlawk hman a nih hmain an lawmna belhchhahin a awm zui.

Depay laka a foul avangin Soyuncu chu a yellow card pahnihna pek a ni a, hnawhchhuah a ni. Dutch team penalty hmuh chu Klaassen laka a foul avanga a chawi a ni bawk a, Foxes defender tan zan hriatreng tlak a ni lo.

A hming chu Depay
Chawlhlawk hman a nihin Netherlands-in goal thum an khung bakah player tam zawk an ni fel der tawh a, chak tur a chiang tawh. Heti chung hian Netherlands boss Louis van Gaal-a'n a player ṭha Depay khek a tum lo a, a khelh chhunzawm tir.

Minute 54-naah Depay-a'n a pu rinna tihlawhtlingin a goal thumna a khung a, bench aṭanga luhtir Til leh Malen-ten minute 80 hnuah an chhunzawm ve leh bawk - Turkey tan Cengiz Under chuan hun pek belhah goal khung ve mah se mualpho zualpui khuhna chauh a ni.

Kum 27 mi Depay-a'n ram tana a match hnuhnung sawm aṭangin goal 12 a khung a, Netherlands tan match 71 a khelh aṭangin goal 33 zet a khung ta - Johan Cruyff leh Abe Lenstra te nen Dutch team tana an goal khung zat a inang.

Netherlands tana goal khung hnem lamah Depay hi pariatna a ni mek a, a chung bera awm Robin van Persie chuan match 102-ah goal 50 a khung thei a, Manchester United striker hlui record nihrual tur chuan hun a la duh deuh dawn.

Hei le Haaland
Erling Braut Haaland-a'n ram tana goal khung a ṭhulhsan thei lo a, an mikhual Gibraltar lakah hattrick a siam - ram leh club tana a match hnuhnung 11-ah vawi hnih chiah goal khung loh a nei!

Norway tan Kristian Thorstvedt leh Alexander Sorloth ten goal khat ve ve an khung bawk a, anni pahnih goal khung karah Haaland hian goal hnih a khung. Borussia Dortmund striker hian minute 27 leh 39-naah a khung a, a goal thumna khung turin hun pek belh a nghah a ngai thung.

Haaland hian hun pek belh nghah ngai loa hattrick siamna remchang tak a nei a, mahse, Real Sociedad striker Sorloth-a siamsak chance duhawm tak chu goal-ah a chantir thei lo. Haaland hian ram tan match 15 a khelhah goal 12 a khung tling der a, kum 21 mi striker chet ṭhat hi Norway tan a pawimawh zel ang.

Haaland hian tun season-ah club tan match nga a khelh aṭangin goal ruk a khung tawh a, German Cup-a 3-0 a Wehen Wiesbaden an hnehna inkhelah hattrick a siam tawh bawk - ram leh club tan tun season-ah hattrick a siam ve ve tawh tihna a ni.