Ronaldo tel loin Portugal chak nuamsa

Portugal-in hrem vangin Cristiano Ronaldo chhawr thei lo mah se Azerbaijan laka goal khung turin harsatna an nei lo a, Bernardo Silva, André Silva leh Diogo Jota te goal khung hmangin an mikhualna ramah 3-0 in an chak.

Inkhel ṭan aṭanga minute 26-na lekah Bruno Fernandes ball siamsak ṭha tak chu Manchester City midfielder Bernardo Silva-a'n mawi zetin a khung a, 'top class' goal a ni.

Minute nga a liam a, mikhual team-in inthlahrun an tum lo. Bruno ball pek chu Jota-a'n a duh angin control thei lo mah se a per lehlam chu Andre Silva ke bulah tak a tla a, RB Leipzig striker tan goal-a chantir turin harsatna a awm lo.

Goal dang lut loin chawlhlawk hman a ni a, mahse, chak tur a chiang tawh - Azerbaijan leh Portugal thiamna a inthlau hret a, Ronaldo tel lo chung pawhin Portuguese team lakah an zawr.

Minute 75-naah Jota-a'n goal khung loa Liverpool pan a duh bik lo tih pholangin an goal thumna a khung ve leh a, João Cancelo siamsak chu ṭha zetin a tauh lut.

Manchester United-a a kir avanga boruak nei lian thar Cristiano Ronaldo chu hrem vangin a inlan thei lo a, Republic of Ireland laka 2-1 a an chak ṭumin Ronaldo hian a goal khung lawm nan a kawr a phelh a, World Cup qualifier-a a yellow card hmuh vawi hnihna a nih avangin Azerbaijan lakah hian a inlan thei lo.

Portugal-in hnehna an chan avangin group A-ah hma an hruai chhunzawm a, an hnuai chiaha awm Serbia-in Republic of Ireland 1-1 a an inhnehtawkpui chu Portugal tan result lawmawm a ni.

Serbia hian Sergej Milinkovic-Savic hmangin minute 20-na lekah hmahruaina goal khung mah se minute 86-naah Milinkovic-Savic-a ball petchhuah turin Nikola Milenkovic perin an lamah a lut a, 1-1 in Ireland nen an inhnehtawk. Serbia-in Nemanja Gudel-a bar pet perte kha an ui vawng vawng ang.

Ireland tan rawlthar keeper Gavin Bazunu chu fak tlak a ni - vawi 10 zet save a neih avangin a team tan point khat a hlawh chhuak a, Portugal tan Manchester City aṭanga Portsmouth-a loan-a khel mek keeper hi lawmthu hrilh tlak a ni.

Serbia an chak zawh loh avangin table-ah pahnihna an ni a, an chung chiaha awm Portugal nen match nga an khelh tawhah point hnihin an inthlau mek - World Cup qualifier boruak a 'hot' chho zel dawn.