Svitolina hnehin Fernandez a tlang

Tleirawl Leylah Fernandez chu a tum ram panin a kal zel a, a kalkawngah hlauh reng a nei lo. Nimin zing khan Fernandez hian Elina Svitolina hnehin US Open semifinal a lut, final lut tur chuan Aryna Sabalenka hneh leh a ngai dawn.

Canadian nula hian Thawhṭanni khan kum 19 a tling ve chauh a, a la naupang hle. Arthur Ashe Stadium-a inkhelah player ṭha leh tawnhriat nei hnem zawk Svitolina lakah hian 6-3, 3-6, 7-6 (7-5) a hnehna changin a dai ngai loh ram a thleng.

Fernandez-i chu
US Open khelh ṭan hma khan Fernandez hian mi hriat a hlawh tam lo, mahse tunah zet chuan player ṭha dangte tan pawha hmachhawn châkawm lo zingah a tel ta - Svitolina lakah set hloh mahse a chiai lo a, dinhmun hniam zawka a dinna aṭangin a tho chhuak thei.

A match hmasa lamah champion lai Naomi Osaka leh 2016 champion Angelique Kerber te a hneh tawh, tunah chuan Olympic bronze medallist Svitolina meuh hnehin semifinal hial a in vaw kai ta.

Fernandez chuan, "Zam lo leh huaisen tak angin ka lang a ni mai thei, a ruk tak chuan ka hlauthawng ve thei hle. Mahse, hlauh neih khan awmzia a neih loh avangin theihtawp ka chhuah tawp mai zel, tunah hian eng ang taka lawm tur nge pawh ka la hrethiam lo," a ti.

Svitolina erawhin tun hma aṭanga a mutan a la hlawn chhuak hleithei lo. Grand Slam huangah bik quarterfinal vawi ruk a khelh tawhah vawi hnih chiah chak a nei a, tunah chuan major title la tur chuan season thar a thlir a ngai dawn ta.

Sabalenka a tlang
Quarterfinal inkhel dangah Sabalenka tan harsatna a awm lo. Seeded pahnihna hian a khingpui Barbora Krejcikova chu 6-1, 6-4 in a sawp a, hnehna chang tur hian darkar khat leh minute 26 bak hun a mamawh lo hial a ni.

Belarus nula Sabalenka hi player ṭha leh theihna nei sang a ni, mahse Grand Slam huangah a zuih leh tlat ṭhin. Tun ṭumah erawh result ṭha neih ngei a beiseina a sang ta viau, inelna lian hnuhnung zawk Wimbledon ang bawkin semifinal a lut.

Kumin bika match 43 zet chak tawh Sabalenka chuan, "Inelna lian zingah chuan US Open hi ka ngainat a ni a, a thiam pali zinga tel phak phei chu thil lawmawm tak a ni, final thleng turin theihtawp ka chhuah zui ang," tiin a vawi khat nan Grand Slam final luh a beisei.

Semifinal thlir zuiin Sabalenka chuan, "An inkhel lai kha ngun takin ka lo en, season duhawm a hmang mek a ni a, ani hneh tur chuan tihsual neih tlem a pawimawh ang," a ti. Quarterfinal-a double faults vawi nga a neih ang kha chhunzawm chi a ni lo ang.