Mercedes driver thar Russell

Formula 1 team champion Mercedes chuan season thara an driver pakhat zawk tur atan George Russell an lalut, ani hian Valtteri Bottas hmun ruak a luah dawn - amah ang bawka British driver Lewis Hamilton nen an tlan dun dawn tihna a ni.

Bottas hian 2022 season aṭang chuan Alfa Romeo a zawm dawn, hei vang hian a hmun ruak luah tur zawn a ngai. Kum 23 mi Russell hian Williams lamah tawnhriat a lo nei tawh a, team ṭha zawk a zawm tur hi a tan thu lawmawm a ni ang.

Britain tlangval Russell chuan, "Hun rei lote chhungin thil a lo thleng thut a, engkim mai hi a mak a ni ber mai. Chona lian leh ropui tak chu a ni dawn," a ti. Mercedes team principal Toto Wolff chuan Russell laka beiseina an neih san thu a sawi bawk.

World champion vawi sarih ni tawh Hamilton pawhin a teammate thar tur chu lo lawmin, "A theihna leh inpekna, chu mai bakah a thawhrimna zawng zawng chhut chuan Mercedes team zawm a phu," tiin a sawi.