Denmark-in Israel lakah goal an surtir

Euro 2020 semifinal an inpetkai kha tihpalh thil a ni lo tih Denmark-in an lantir zel a, World Cup qualifier-ah an mikhual Israel chu 5-0 ngawtin an sawp.

Denmark tan RB Leipzig forward Yussuf Poulsen, captain Simon Kjaer, Bologna winger Andreas Skov Olsen, Sevilla midfielder Thomas Delaney leh Trabzonspor striker Andreas Cornelius ten goal khat ṭheuh an khung a, Israel lamin a chhanletna tur an nei lo.

Group F-ah Denmark-in match ruk an khelh aṭangin hnehna an la chang vek a, goal 22 zet khungin an lamah goal a la lut miah lo! Table chung berah an awm mek a, anmahni hnaih bertu Scotland aiin point sarihin an sang zawk.

Scotland hian 1-0 in Austria an hneh ve bawk a, Lyndon Dykes chuan minute 30-na lekah inkhela goal awmchhun hi penalty hmangin a khung - penalty hi Martin Hinteregger-a'n Che Adams laka a chawi a ni a, video assistant referee hmanga ennawn a nih hnuah pek a ni.

Che Adams hian Scottish team tan khung belhna remchang nei mah se a hun ṭha neih a chhawr thei lo thung.

Austria tan an player chhuanvawr Marko Arnautovic leh Christoph Baumgartner ten hun ṭha neih an chhawr bik lo a, Scotland-in an defender Stephen O'Donnell handball vanga penalty an chawi lo chu an vannei hle - VAR-in Austria a chhan ve lo.