Argentina leh Brazil inlan hun
Zirtawpni zing hian South America ram ten World Cup qualifier an khel dawn. Match hnuhnung zawk khel zo thei lo Argentina leh Brazil te chuan ram hran ve ve mikhual an thleng dawn a ni.
Dar 5:00-ah Lionel Messi awmna Argentina hian Bolivia an mikhual dawn, an mikhual tur hi inelna neih laia vawi khat chauh chak la nei an ni. Lionel Scaloni-a'n a player ṭha ṭhenkhat chhawr thei dawn lo mah se an chak chu a rinawm tho.
Tite-a enkawl Brazil pawhin dar 6:00-ah Peru an mikhual dawn, table hmahruaitu Brazil hian an player pawimawh pariat vel ngawt chu hripui leng inkaihhruaina vangin an ko haw thei lo a, mahse point thum hmu thei tur squad erawh an la nei phak ang.
An kim lo
Argentina hian Premier League player Emiliano Martinez, Emiliano Buendia, Giovani Lo Celso leh Cristian Romero te an ko a, an player kohte hi Venezuela lakah chhawr thei mah se Brazil laka harsatna siamsaktu an ni - tunah chuan England lamah an kir leh tawh.
La Albiceleste hian an ṭhat dan berin an khel thei dawn tawh lo tihna a ni a, chutih rualin Messi leh Lautaro Martínez te an la nei miau a, midfielder ṭha mi Rodrigo De Paul a la awm bawk avangin Bolivia tan chuan hmachhawn châkawm lo tak an la ni ang.
Venezuela an hneh ṭumin Messi-a'n na taka beih a tawk a, vanneih thlak takin a na lo hlauh. Barcelona captain hlui hi tlarhma lamah Inter Milan striker Martinez nen an inkawp rem a, ball thiam Leandro Paredes leh Rodrigo de Paul te nena an chetlaho lai hi a hmuhnawm leh dawn.
Rinkai Brazil
Tite-a'n Qatar World Cup thlir chungin team a din a, tunah chuan nghet ṭha tak an ni tawh. Copa America pawh khan Brazil hian World Cup inbuatsaih nan an hmang ṭan tawh hiala ngaih a ni a, qualifier bikah phei chuan match sarih an khelh tawh chinah an chak vek.
Premier League player chhawr thei lo mah se, forward Neymar an la nei. Ani bakah hian Casemiro, Marquinhos, Danilo, Alex Sandro, Vini Jr leh Lucas Paqueta te an la awm miau avangin khawi ram mahin an hmachhawn chak chuang lo ang.
Brazil khingpui tur Peru hi Copa aṭang tawha team talbuai an ni a, tunah hian table-ah pasarihna an ni mek. Mahse, an match hnuhnung berah Venezuela an hneh thei a, beiseina an neih thar ve leh mek avangin Brazil tan pawng tawng zuam chi erawh an ni dawn bik lo.