Pep hi Spain coach ni se ka ti - Luis Enrique

Luis Enrique chuan Spain coach hna chu lawm takin Pep Guardiola hnena a pek chhawn theih tur thu a sawi. La Roja hian nizan khan Kosova an hmachhawn a, result kan hre hman lo.

Kum 51 mi Enrique chuan, "Thleng thei se ka duh. Guardiola hi Spain coach ni thei se, a inrem thlap dawn. Kan ram team, Guardiola-a'n a hrual tur hi ka hmu châk a ni. Spain tan ani aia ṭha an awmin ka hre lo," tiin Barcelona-a a khelhpui ṭhin a fak hle.

Spain hian Euro 2020-ah khan semifinal an thleng a, champion zui ta Italy an hneh lo. La Roja hi World Cup khel tura an inpetling zo lo a nih ngawt loh chuan Enrique hian a hna hi a chelh zel a rinawm.

Pep erawhin Manchester City-ah kum 2023 thleng contract a nei a, hemi zawha a awm dan tur hi hriat a la ni lo. Spanish manager hian ram team enkawl a châk thu a sawi lang a, Enrique duhthusam hi a thleng a nih chuan a hmuhnawm khawp ang.