MSL khel tur BC Bethlehem
BC Bethlehem chuan Mizorama basketball inelna sang ber Mizoram Super League khel turin an tling. Nilai zan khan BC Bethlehem chuan MSL5 khel turin Zarkawt Serpents chu 81-69 in an hneh a, team pathum inelna MSL5 Qualifying-ah pakhatna an ni.
ADBBA champion Zarkawt Serpents erawh an chak zawh tak loh avangin April 3, 5 leh 6 hian Republic VR4 nen MSL khel tur playoff hmangin an zawng thung ang.
Match pawimawh
Kolasib Timeout hnehtu pahnih Bethlehem leh Serpents te league round hnuhnung berah an inkhel a, a chak zawk tan MSL khelh theihna a nih avangin inkhel pawimawh a ni. Serpents hian ADBBA hnuaia inelna final-ah Bethlehem an hneh a, heta an chakna avang hian nomawi chawi mah se MSL khel tura hamṭhatna an neih belh lo.
Bethlehem-in hun ṭha bawhpelh an tum lo a, UBA-a Punjab Steelers tana khel Irakoze Kavakure Brian hmangin bul an ṭan ṭha a, quarter hmasa pahnihah chak zawk ve vein chawlhlawk an hman chuan 40-28 in hma an hruai a. Bethlehem tan captain Samuel Malsawmkima a ṭangkai a, 3 points vawi nga zet a neih avangin Sahil Sharma telna Serpents tan thawhchhuahna remchang a siam sak lo.
Bethlehem hian an coach Vanlalnunsanga (Lana) tawnhriat an hmang ṭangkai a, ani hi Khatla TBL-in MSL vawi hnih an champion ṭuma captain leh assistant coach hna chelhtu a nih avangin pressure sangah a uapna a pawimawhna hle.
Bethlehem an lawm
BC Bethlehem president Emanuel Lalhriatzuala Ralte chuan, "Bethlehem Vengin Mizorama inelna sang ber hi khelh kan duh a, MSL playoff hmasa bera kan tlin tak loh hnuah pawh kan beidawng lo. Kan ṭang sauh sauh a; Pathian hruaina, veng mipuite ṭawiawmna, player leh coaching staff-te thawhrimna baka sum leh paia min ṭanpuitute zarah kan tum ram kan thleng thei hi kan lawm hle a. a ni," tiin Vanglaini a hrilh.
MSL5-a inlan tur BC Bethlehem hi April 2006 a din a ni a, kum hnih chhung ṭha taka an kal hnuah kum thum chhung chawl lehin kum 2012 khan tuai thar leh a ni. MSL Playoff hmasa berah khan Bethlehem hian semifinal an thleng a, 2015-16 season khan MBBA hnuaiah Division II champion niin Division I-ah an inhlangkai.
Division I-a an awm kum khatnaah hian semifinal an thleng a, April 25, 2017-a MBBA aṭanga ADBBA a pian khan Women's Division-ah hmeichhe team an nei bawk. 1st MBBA Inter District Tournament-ah champion hmasa ber niin final-ah Kolasib Timeout an hneh a, ADBBA Division I-ah erawh final-ah Serpents an hneh lo.
MSL an khelh theihna kawngah BC Bethlehem tan Kolasib Timeout an ṭangkai a, anni hian qualifying hi hmachhawn lo se chuan ADBBA Division I champion Zarkawt Serpents hi MSL khel tura tling nghal tur an ni. Amaherawhchu, Timeout-in inelna an hmachhawn takah chuan BC Bethlehem hian an hmang ṭangkai a, Serpents laka phuba lak nan an hmang nghal bawk a ni.