ISL Thlirletna Mizo player an che ṭha tawk em?

India rama football inelna ngaihhlut hlawh ber Indian Super League khelh zawh a ni a, he inelnaah hian Mizoram player 18 ngawt an tel.

Mizo player zingah Lalruatthara chu ISL-a a season hmasa berah Emerging Player of the League-ah thlan nghal a ni a, Jeje Lalpekhlua leh Jerry Lalrinzuala chu ISL champion Chennaiyin FC-ah player pawimawh an ni bawk.

Mizoramin professional goalkeeper kan neih awmchhun Lalthuammawia Ralte-in Bengaluru FC tan a khel a, Mizoram player 18 zinga pali chu draft-a tel loa club-in an chelh sa an ni a, a bak 14 dang hi draft aṭanga club-in an lei te an ni thung.

Mumbai City-a Mizo awmchhun Lalchhawnkima'n season laihawlah Aizawl FC chu loan-in a zawm bawk a, Maharashtra club tan hian a inlan hman lo.

Mizo mawina J&J
Chennaiyin FC-in Mizo player pahnih Jeje Lalpekhlua leh Jerry Lalrinzuala an nei a, South Indian club champion-na kawngah player pahnih hian an thawh hlawk hle. Jeje-a'n match 21 khelh tur awm aṭangin match 20-ah a hmel a lan a, khelmuala minute 1705 hun a hman chhungin goal kua leh assist vawi khat a nei. Hero of the Match-ah vawi thum thlan a ni a, December khan Player of the Month-a ni bawk.

ISL chanchinah Jeje hi Indian player goal khung hnem ber niin goal 23 a khung tawh a, a pumpuiah pawh Hnahthial tlangval hi pahnihna niin goal 28 khungtu Iain Hume chiah a tluk lo. Bethlehem rawlthar Jerry-a'n match 21 aṭangin match 20-ah a hmel a lan a, assist vawi hnih a nei. Season hmasaa Emerging Player of the League hi tun season-ah Hero of the Match-ah vawi khat thlan a ni a, Emerging Player of the League-ah vawi riat thlan a ni bawk. Jerry hian khelmuala minute 1800 hun a hman chhungin tackle 56, interception 23, clearance 42 leh block 20 a nei.

Bengaluru leh Mizo
ISL-a an season hmasa berah Bengaluru FC-in final lut nghal mah se I League club hluia Mizo player-ten hmun pawimawh an chang phak lo.

Goalkeeper Lalthuammawia Ralte chu match hnihah inlanin match khat zawkah goal a chhuah a, target-a shot awm pariatah vawi khat chiah a chhuah a, save vawi sarih a nei -a save percentage hi 87.5% a ni.
Champhai goalkeeper hi match hnih chauh a khel chungin Emerging Player of the Match-ah vawi khat thlan a ni tho a, season thar aṭang chuan FC Goa tan a khel ang.

Daniel Lalhlimpuia'n match hnihah a hmel lan mah se substitute bench aṭanga lut a nih avangin khelmualah minute 15 chauh hun a hmang a, danglamna a thlen hman lo. Aizawl FC-in I League nomawi an chawina kawngah Zohmingliana Ralte inlan mah se Ramhlun South tlangval hian BFC tan erawh ISL-ah minute li bak hun a hmang lo. Chaltlang rawlthar Malsawmzuala tan ISL-ah hmun a awm lo bawk.

Jerry Mawia a mawi
ISL-a a season hmasa berah Jerry Mawihmingthanga'n season hmasa khan NorthEast United tan hmun a chang phak meuh lo a, tun season-ah erawh Jamshedpur FC tan player ṭangkai a ni.

Chanmari rawlthar hian match 16-a khelhah goal khat khungin assist vawi thum a nei a, Emerging Player of the Match-ah vawi nga thlan a ni. Hei mai hi a ni lo, Jerry-a'n Kerala Blasters nen an inkhelh ṭumin second 22-na lekah goal a khung a, ISL chanchina goal khung rang ber a ni. Hetihlai hian Jerry ang thoa DSK Shivajians aṭanga inzir chhuak Sairuatkima tan JFC-ah hmun a awm lo a, season tluanin a inlan lo.

Dynamos tan Zuala & Sena
Lallianzuala Chhangte-in Delhi Dynamos tan league match 18 a khel kim vek a, goal thum khungin assist vawi thum a nei.

Lunglei rawlthar hi Hero of the Match-ah vawi hnih thlan a ni a, Emerging Player of the Match-ah vawi li thlan a ni bawk. North Mualcheng tlangval Sena Ralte-in Dynamos tan match ruk a khel a, season duhawm tak tia sawi tur a ni hran lo.

Highlanders an sang lo!
NorthEast United-ah Mizo pathum Robert Lalthlamuana, Lalrindika Ralte leh Lalrempuia Fanai te an awm a, beisei angin Highlanders erawh an thlen san pui lo.

Mizo zinga ISL club captain hmasa ber ni turin Robert Lalthlamuana chu captain armband hrentir a ni a, Khawzawl tlangval hi match kua a inlan. Hliam vanga a buai zeuh zeuh chungin Lalrindika Ralte-in match 12-ah a hmel a lan thei tho a, assist vawi khat a nei. Didika'n khelmual chhungah minute 729 hun a hman chhungin vawi 409 pass a nei a, a passing accuracy hi 62.59% a ni. Lalrempuia Fanai-in match thumah a hmel a lan a, khelmuala a hun hman rei zawng hi minute 182 a ni.