Mizoram 0-1 Kerala

Santosh Trophy-ah Mizoramin kum li chhungin vawi thum semifinal lut mah se, vawi khatmah final an thleng lo. Nimin khan Mohun Bagan Ground-ah Mizoram hian Kerala an hmachhawn a, 0-1 in an vanduai.

Semifinal pakhat zawkah inelna thlengtu West Bengal-in Karnataka chu 2-0 in an hneh ve bawk.

Football-a state leh state inelna sang ber Santosh Trophy vawi 72-na final hi April 1, Pathianni hian khelh a ni ang.

Sanga an hrem
Mizoram coach Lalsangzuala Hmar chu Karnataka an hneh loh ṭumin hnawhchhuah a ni a, nimin inkhelah hian MPL-a Chhinga Veng champion puitu coach hi technical area-ah awm phalsak a ni lo.

Khelmual chhungah erawh Mizoramin an player neih ṭhat an chhawr a; tun inelnaa goal khung tawh Lalromawia (4 goals), F. Lalrinpuia (2), Lalremruata (2), Lalbiakhlua (1) leh MS Dawngliana (1) te chu starting eleven-ah an rawn inlan vek.

An chungnung hret
Mizoramin fimkhur takin bul an ṭan a, an khingpui Kerala an la fimkhur mah zawk. Mohun Bagan Ground-ah inkhel hmuhnawm thlir tur a tam lo.

First half-ah Mizoram an chungnung hret a, an chance neih ṭhat ber chu Punjab laka goal hnih khungtu Lalremruata'n goal-ah a chantir thei lo. Samlukhai rawlthar Romawia pawhin goal-ah pet mah se Kerala keeper Midhun V-a'n ṭha takin a dang.

Mizoram tan Lalbiakhlua a khel ṭha a, Mizoram Police winger hian hun chanve hmalam hian ball cross ṭha vawi thum a nei a, goal erawh a keng tel lo.

Substitute awmze nei
Second half-ah Mizoramin an nawr chhunzawm a, danglamna thlentu erawh first half injury time-a lut Afdal VK a ni.

Minute 54-naah Jithin MS chuan ding lam aṭanga ball la lutin a cross ball chu Rahul KP-a'n goal-ah a pet a, an dan per hnuah goal ban perin hemi per hi subsitute Afdal-a'n hmahruaina goal khung nan a hmang.

Afdal hian Chandigarh leh Manipur an khelh ṭumin goal a khung tawh a, tun ṭuma a goal hi tun inelnaa a goal thumna chiah a ni.

A tho chhuak lo
Kerala-in goal an khung hnuah goal venhim hna an thawk a, counter attack-a nawr let turin an inpeih reng tho.

Goal duhin Lalrammawia leh Lalmuanzova te chu bench aṭanga luhtir an ni a, amaherawhchu player tlan chak pahnih hian Kerala tlarhnung inrem phui vek karah an thiamna pholanna tur an hmu lo a, Kerala an inrem phui vek tawh.

Mizoram lamin hun tawpah an nawr bet vek a, injury time minute ruk belh ni bawk mah se goal chance ṭha an insiam thei lo. Mizoramin vanneihna beiseiin MC Malsawmzuala an luhtir a, Siaha tlangval pawhin danglamna a thlen bik lo.

Goal venhim tum Kerala an hlawhtling a, Mizoram erawh inkhel thununtu zawk ni mah se goal an khung theih miau loh avangin an zin kawng chu semifinal-ah a tawp.

Semi finalist!
Mizoram hi tun hnai kum li chhungin semi final-ah vawi thum an chak lohna a ni - ṭum hnih hi penalty shootout-ah a ni a, kuminah erawh si khat phurin an tla.

2014-ah an champion a, 2015-ah Punjab chu semi final-ah penalty-ah an hneh lo. 2017 semi final-ah penalty-ah bawk West Bengal an hneh lo. Kuminah semi final-ah bawk an tla leh ta.

Mizoram hi tun hnaia record nei ṭha ber pawl niin semi final hi thleng thei deuh reng mah se, ISL, I League leh Second Division I League lamah player ṭha an chhuak ṭhahnem tawh a, player ṭha thlan tur an tlem sawt hle.

Kumin bik hi tualchhung player ṭha zingah pawh koh theih loh tam kum a ni a; Mizoram Police lamah MPL6 player ṭha an luh nual avangin training an nei a, chhawr theih an ni lo - Mizoram team ṭha ber kan hmu thei lo a ni.