Super League an ṭan dawn ta
2018 Indian Super Cup chu zanin hian khelh ṭan a ni dawn a, tun season Indian Super League champion Chennaiyin FC leh nikum I League champion Aizawl FC te chu match hmasa bera inkhel tur an ni.
AIFF buatsaih inelna hi round of 16 aṭangin a inṭan a, hemi hma hian qualifying round a awm bawk. Qualifying round chhiar tel chuan inelnaah hian ISL leh I League club 10 ve ve an tel kim a, chak loa tlak zel a nih bakah season zawh tawh hnua khelh a nih avangin sawisel a hlawh a, amaherawhchu a buatsaihtu hi India rama football thuneitu sang ber a nih miau avangin dahhniam theih erawh a ni lo.
Jeje tel lohna
India-in Kyrgyzstan an hmachhawn ṭuma goal khungtu Jeje Lalpekhlua chu chawlh hmangin Mizoramah a awm mek a, Aizawl FC a hmachhawn ve dawn lo.
Mizo player dang Jerry Lalrinzuala bakah India team-a tel dang Anirudh Thapa leh Dhanpal Ganesh te erawhin Chennaiyin training an zawm lehnghal. ISL champion hian tun dinhmunah Super Cup an ngai pawimawh tawk lo niin a sawi a, Mizo club an hmachhawn hunah hian an foreigner pawh an kim lo ang.
MK-a'n a belh
AFC Cup-ah Aizawl FC-in defender Lalchhawnkima leh H. Lalmuankima te an chhawr thei lo a, Super Cup-ah erawh tawnhriat nei ṭha pahnih hi an khel thei tawh ang.
Mizo club coach Santosh Kashyap chuan, "Nomawi lam ka la ngaihtuah lo a, Chennaiyin nena kan inkhel tur chauh hi kan rilrua awm chu a ni. Kimkima leh MK-a ten min telpui hi ka lawm a, knockout stage a nih vangin eng result pawh thleng thei a ni," tiin Vanglaini a hrilh.
Season ṭan hma khan Paulo Meneses-a enkawl Aizawl FC chuan ISL club Chennaiyin chu an tlawh a, friendly match-ah hian Chennai club hi 1-0 in an chak. Kashyap chuan, "Khatih hunlai leh tun hi chu team dang ve ve kan ni tawh a, khai khin theih a ni lo," tiin an inkhelh tawhna nen sawi zawm theih a nih loh thu a sawi.
Super Cup-ah hian foreigner paruk ziah luh theih a ni a, playing eleven-ah panga zel chhawr theih a ni. Aizawl FC-in Kareem Omolaja leh Yugo Kobayashi te chhuah hnuah player an lak belh loh avangin Masih Saighani, Andrei Inonescu, Leonce Dodoz leh Alfred Kemah Jaryan te chiah an kawl.
Inkhel dang
Pathianni zan dar 5:00-ah ISL league round-a pakhatna Bengaluru FC-in qualifying round-a NorthEast United hnehtu Gokulam Kerala an hmachhawn dawn a, zan dar 8:00-ah I League club pahnih Mohun Bagan leh Churchill Brothers te an inkhel dawn bawk.
Bengaluru tan qualifying round-a goal hnih khungtu Henry Kisekka chu ven uluk a ṭul hmel a, Mohun Bagan tan Churchill Brothers striker thar Willis Plaza en liam theih a ni lo ang.