Cricket Australia-in a player-te a hrem

Australia player pathum Steve Smith, David Warner leh Cameron Bancroft te chu South Africa nen an inkhelh ṭumin phal baka ball an khawih danglam avangin Cricket Australia (CA) chuan an chungah hremna a lekkawh.

Head coach Darren Lehmann pawhin South Africa nen test match an khelh zawhah a hna a bansan ang. Nimin khan test match vawi lina chu Wanderers Stadium-ah khelh chhunzawm a ni a, South Africa hian 2-1 in hma an hruai mek.

CA chuan captain Smith leh vice-skipper Warner te chu kum khat chhung cricket khel thei lo turin a hrem a, Bancroft pawh thla kaw chhung a hrem bawk. Kum 28 mi Smith leh Bancroft, 25 te hi a tlem berah kum hnih chhung Australia tan an captain thei dawn lo a, kum 31 mi Warner phei chu hruaitu zingah an tel tawh dawn lo.

Cricket Australia hian ICC aiin an player-te an hrem na zawk a, cricket thuneitu lam chuan dan angin Smith chu match khat khel thei lo tura an hrem bakah a match fee chu 100% an chawitir a, Bancroft pawh match fee 75% chawitirin demerit point pathum a pe bawk.