Manchester City tan nomawi a hnai

Chawlh kar hnih chhung an chawlh hnuah Premier League an khel ṭan leh dawn. Zanin dar 10:00 hian Everton khelmualah Manchester City an lenglut ang.

Pep Guardiola enkawl Man City tan league nomawi chawi turin point ruk bak a ngai tawh lo. Everton lakah hnehna an chan a, April 7 zana Manchester United an mikhual huna hnehna an chan bawk chuan an champion tawh dawn.

Vincent Kompany chuan, "Manchester City ṭan tuten tun anga hun ṭha hi dam chhungin vawi khat bak an tawng lo ang," tiin a lo sawi tawh a, United hneh chung ngeia nomawi chawi an duh avangin Everton laka hnehna chan hmasak a pawimawh a ni.

Man City hi champion tur chianga ngaih an ni tawh. Amaherawhchu, Pep-a naute hi Goodison Park-a an lenluh hnuhnung berah 4-0 ngawtin an tlawm. August thla khan team pahnihte hi 1-1 in an inhnehtawk leh tawh bawk, tun season chhungin Toffees chiah hi Eithad Stadium aṭanga point hlawh chhuak thei an la ni.

City tan hian khup hliam vanga chawl lai Sergio Aguero-a'n inkhel bul a ṭan theih a beisei awm loh a, mahse Germany laka chakna goal awmchhun khungtu Brazil striker Gabriel Jesus a dam tawh avangin tlarhma lamah buaina a awm lo tura ngaih a ni.

Spanish manager Pep-a'n tun hnaiah a player duhlai Kevin De Bruyne, Fernandinho leh Nicolas Otamendi te contract thar a ziah pui. Ningani khan David Silva chuan kum khat daih contract a ziak thar ve leh bawk.

Kum 31 mi Silva hi chhungkaw buaina vangin Spain squad aṭangin a inhnukdawk a, zaninah erawh a inlan theih beisei a ni. Silva hian City tan a vawi thum nan league nomawi chawi leh a beisei mek.